Jungkook In Instagram Ih A Thil Post Mi Zaten A Hlon Thluh, Army Pawl An Anhai, An Mangbang

BTS lakih hlasakthiam hminthang Jungkook in a Instagram sungih a thil post mi, zuk le video zaten a hlonhlo thluh ruangah anmah ngainatu army pawl cu an anhai zet. “Ziang a cang?” an ti rero.

Jungkook in mipi hnenah theihternak zianghman a tuah lo. A zuk le video pawl cu pakhat hnu pakhat a hlon vivo ih May 30, 2022 ahcun a thianfai thluh. Army pawl cu an mangbang tuk ih online parah a thuhla an sutaw cece.

A zuk le video pawl a hlonhlonak san an thei lo ih a parah thildik lo a thleng maw si tin an thinphang. Jungkook cu BTS lakah kum nauhak bik a si ih a lar zet, kum 24 mi a si. Jimin khal online parih a cangvaih lonak a rei zet zo.

Ṭhenkhat in an hlathar an tlangthan zik thlang ruangah a si men thei, asilolen US President Joe Biden an va ton zik ruangah tla a si ding’ an ti. BTS pawlin simfiangnak an nei hrih lo.

BTS pawlin an Album thar ‘Proof’ timi cu June 10, 2022 ah an tlangthan ding. Tu’ah BTS pawl cu US president Biden tong dingin Washington, D.C ah an um lai.

Thudang: Tlawnginn Nauhak Thi Lakah A Tel, A Thih Hlanah Thuthangṭha A Phuang
May 24, 2022 zing ah US, Texas khawpi ah thimkhawzing a tlung. Mino kum 18 mi in tlawngta nauhak pawl a kap ciamco ih nauhak 19 le zirhtu 2 an thi. Tualthattu cu palik pawlin an kap that ve. Nulepa tam zet cu mitthli thawn caan an hmang rero lai.

Mithi lakah nauhak kum 9 mi Ellie Garcia khal a telve, Christian innsang ih thanglian a si. Zantinten ring zetin thlacamnak a nei ṭheu. A thih hlanah social media fehtlang in thuthangṭha a phuang. Ellie in, “Hey, mipi pawl. Thil pakhat ka lo sim duh. Na hrangah Jesuh a thi, curuangah kan thih tikah Jesuh hnenah kan um ding. Ka room sungah Jesuh zuk pathum ka nei” tin a phuang. Ellie cu a pai fa duat a si.

Hringtu a pa in, “Zantinten ring zetin thlacamnak a nei ṭheu ih kan va tawiawm ṭheu, June 4th ah a suak. Hmaizarh ah a suahcam ni a thleng ding. Ka fanu duhtak, vanram ah ka lo pomsal thei hlanlo cu ka thinlung sungah ka lo pom ringring” a ti. Bawmnak GoFundMe an tuahsak ih $50,000 goal an nei, tu’ah 129,862 an ngah zo.

Thudang: A Fa’ei Naupai Lai A That Hnuah Amah Le Mah A Thataw
Thailand, Buriram khua ih um pacang kum 55 mi Phet in a fa’ei kum 32 mi Autjima cu a kap that hnuah amah le mah a kapaw that. May 26 ah an innsung ah thicia in hmu an si, an ruak kiangah pistol aum. An lu ah meithal kahnak hliamhma aum. An sungkhat pawlin an karlak ih buainak cu an relsuak duh lo. An vengsung mipi pawl khalin an buainak an thei lo.

Pacang Phet cu an khuatlang hruaitu upa pakhat a si, nupi a nei ih a nupi ih fanu pahnih thawn an umtlang khawm. Phet cu lamzin kap ah dawnfawh a zuar ṭheu, vengsung mipi pawlin a ṭong mal tuk ih mi a bia dah lo’ an ti.

Palik pawlin an zingzoinak ah a fa’ei hi pasal nei pekte a si ti an thei, a pasal neihnak cu ni 7 lawng a si lai. Thla 6 mi naupai in pasal a nei, a pasal cu khua dangah hnaṭuan in arak um ih ziangruangah Phet in a nupi a that ti a thei ve lo. Palik pawlin tualthatnak phen ih thilthleng hi an zingzoi rero lai.

Thudang: Thailand Ralkap In Ramri Ah Ritheihsii Phur Mi 8 An Kap That
Myanmar-Thailand ramri ramlak ah Thailand ralkap pawlin ritheihsii phurtu mi 8 an kap that. Thailand cozah in Myanmar ramsung ihsin ritheihsii phur an um ti an theih veten an va zingzoi. May 27 simlam ah an duty.

Mae Fa Luang khua kiang lilawn ah minung 10 an hmu, an zaten meithal in an keng ih rucksacks an pai. Thailand ralkap pawlin hlaral ihsin “Kan lo check a ṭul” an ti veten ritheihsii phurtu pawlin an kap hmaisa. Minute 10 sung an kapaw. Thailand ralkap pawlin an va zohdik ih mithi ruak 8 an hmu, rucksacks 11 khal an hmu. Rucksacks sungah ritheihsii tam zet aum.

Tui thla thok lam khalah Chiang Rai ramri ah Thailand ralkap pawlin ritheihsii phur mi 8 an kap that zo, an kutsung ah ritheihsii 6.7 million an kai ngah. Myanmar ramsung ih um ‘The Golden Triangle’ cu ritheihsii sersuahnak hmunpi a si ih leitlun ram dangdang ah an kuatsuak ṭheu.

Be the first to comment

Leave a Reply

Your email address will not be published.


*