“Ka Tuarnak Ihsin Ka Nunnak Ka Cemter Ruangah Pathian In Hremnak In Pe Ding Ti Ka Zum Lo” A Ti

Colombia pacang kum 60 mi Victor Escobar cu cuap natnak in a damlo ringring, a cuap damlonak in a taksa sungah natnak phunphun a hringsuak vivo ih amahten khal a feh thei nawn lo. A damlonak hi sibawi thiamsang pawl khalin an tuamhlawm dam thei nawn lo ih beidong in an um zo.

Curuangah Victor Escobar in, “Ka damlonak ruangah ka innsang pawl khal an harsa thluh. Hitin harsatnak ka tuar ringring aiin ka nunnak hi ka cemter sawn ding” tin cozah hnenah a dil. Asinan cozah in an siang lo, kum 2 sung cu a nunnak cemter dingin court, siizung le biakinn ah a dil ringring ih kum 2 hnuah an cohlang sak.

January 7, 2022 ah Victor Escobar cu amai duhhrilnak in Cali siizung sungah a nunnak an cemter, siivai in an dawt ih leitlun harsatnak pawl a suahsan. Victor Escobar cu a thih hlante ah a innsang pawl thawn nuam zetin caan an hmangtlang lawk.

Victor Escobar in, “Pathian in minung pawl harsatnak tuar ringring hi A hmu duh lo. Harsatnak ka tuarmi ihsin ka nunnak ka cemter ruangah Pathian in hremnak in pe ding ti ka zum lo. Nan zaten mangṭha ka lo ti siang lo, kan tongaw sal ding sawn a si” tin a nunnak cu a cemter.

Victor Escobar hi Colombia ramsung ah cozah theihpinak ih mai nunnak cemtertu hmaisabik a si, Colombia ramsung ah daan vekin mai nunnak cemter theinak daan hi aum hrih lo nan Victor Escobar cu amai ngen, a dinhmun in a pe lo tuk ruangah a duhhrilnak vekin an fehter. Europe ramsung ah Belgium, Netherlands, Luxemburg le Spain ram pawlin nun beidong tuk pawl cu anmai duhhrilnak vekin an nunnak cemter theinak daan le dun an nei zo.

Be the first to comment

Leave a Reply

Your email address will not be published.


*