Kachin Hlasakthiam Hminthang A Thi

Kachin hlasakthiam hminthang Seng Hkawn Mai cu January 6, 2022 zingpit nazi 4:00 ah a damlonak sul cancer in hi leitlun harsatnak pawl a suahsan. Japan ramah aum ṭheu ih sul cancer in a damlo, a cancer hi tuamhlawm theih nawn lo dinhmun cancer netabik a thleng.

Myitkyina khawpi ih an umnak inn ah mual a liam. Awnmawi khawvel ih a rualpi in, “Cancer netabik dinhmun in a thi, a harhdamnak a ṭha lo ruangah awnmawi khawvel a suahsan hi a rei zo. Japan ram ah a sinpi zetin ka rak thei nan, tuizing ah a thuthang ka thei cu ka riahsia tuk. Pathian tangsung ah hnangamten cawl thlang aw” a ti.

Kum 37 mi Seng Hkawn Mai hi Kachin ramsung ahcun a hminthang zet, zaihla thawn Kachin mipi pawl rak awi ṭheutu a si. 2006-2007 kum ah Album pahnih a suah ih a hlawhtling zet. Hitin an hlasakthiam in mual a liamsan ruangah Kachin mipi le awnmawi ngainatu pawl cu an riahsia zet.

A ruak cu January 7, 2022 zinglam nazi 10:00 ah Christian daan vekin an vuiliam ding. December 17, 2021 zinglam nazi 8:25 ah Kachin lemcan thiam hminthang G Ting Sau cu cuap cancer in Kachin mipi pawl arak fehsan zo.

Be the first to comment

Leave a Reply

Your email address will not be published.


*