Kachin Nunau Pawngsual Tumtu Ralkap Cu Ralhrang Pawlin An Kai, Amah Kiltu Ralhrang 3 A Kap That Ih A Tlansuak

Shan State, Kutkai khua ih um Kachin nunau kum 50 mi cu ralhrang pakhat in pawngsual a tum ih a vel ciamco, mi pawngsual tumtu ralhrang cu an pule pawlin an kai. An kil laiah meithal a la thei ih amah kiltu ralhrang pathum cu a kap that hnuah a tlanhlo.

April 12, 2022 zinglam nazi 9:00 hrawngah Kachin nunau cu a u tei hmuan ah hnaṭuan bawm dingin ava feh, asinan “Tuisun cu hna kan ṭuansal lo dng” an rak ti ruangah a tlungsal. Lamzin ah ralkap duty pakhat thawn an tongaw ih ralkap cu zukam nam a si.

Ralkap in a dung ihsin a tlung ih lamzin kap ah sualpi tum in a nam, a au ciamco ruangah ralkap in “Au aw hlah” tin a hngawng ah a rek ih a thong ciamco. Kachin nunau cu a tal ciamco ih a talsuak thei, a tlan ih ralkap in a dum vivo.

An inn hmai tiang a tlan thei, an inn hmaiah ralkap in a dum man ih leithanel lakah a namsal. Ralkap in a hmai le a lu ah a thong ciamco ih a sualpi tum, vengsung mipi pawlin an thawmvang an theih ruangah an va zoh ih ralkap in nunau a sualpi tum ti an thei ih an ṭhen.

Ralkap in a sualpi ngah lo ih a tlan, vengsung mipi pawlin an pule hnenah an sim thei ih ralkap cu an kai. An khua ah ralkap pawl hi umhmun khuar pekte an si. Kachin nunau cu hliamhma nasa zet a tuar ruangah siizung ah an tuamhlawm rero lai ih ralbawi pawlin zangnadawmnak ah tingkhat an pe.

Ralkap cu an kai, zanlam nazi 5:00 hrawngah a kut an tawnbetnak hridai cu an phelhsak. Meithal a la thei ih amah kiltu ralkap 4 cu a kap ciamco ih 3 cu a hmun ah an thi cih, cumi hnuah a tlanhlo ih an hawl rero lai. Hitin a tlansuah laitakah tuahmawh tong innsang le khua upa, ralbawi pawl tonkhawm awknak an rak nei ih remnak tuah dingin thu an rel rero laitak a si.

Mi pawngsual tumtu ralkap cu a tlansuak ruangah remnak khal an rel theisal lo ih an tlung thluh. Tualsung mi pakhat in, “Ralbawi le khua upa pawl thawn remnak tuah dingin thu kan rel rero laitak ah meithal awn vei 10 hrawng kan thei.

Zanlam nazi 5:00 hrawngah a si, khuasung mipi pawl khal an lau tuk. Ralhrang pawlin mi hringhronak ah meithal an kap si ding kan ti lawk, meithal awn a reh hnuah ralhrang pawlin “Khilam ah a tlan, a tlansuak. Ralkap pathum a kap that ih a tlan” tin lamzin ah an au ciamco ih an dum. Curuangah kan thurelmi thubuai khal hitin kan cawlhsan lawk, thubuai hi kan cinfel thei hrih lo ih kan tlung thluh. Ralkap tlansuak cu an hawl rero lai” a ti.

November 12, 2021 khalah Kutkai Township, Pha Khet khua ah ralhrang pakhat in pitar kum 62 mi a pawngsual ih an nunphung daan vekin remnak an tuah. Kachin State, Numlang khua ih um nunau kum 52 mi cu July 14, 2021 ah ralhrang pathum in an pawngsual hnuah an that.

Be the first to comment

Leave a Reply

Your email address will not be published.


*