Kachin Ramsung Ah An Doaw Ciamco, Khuasung Mipi Pawl Cu An Tlansuak Tum Ih Ralkap Pawlin Zohman Tlansuah An Siang Lo

Ralkap pawlin mipi kilhimtu pawl an do neh nawn lo ruangah khuasung mipi pawl parah an cangvai ṭheu. August 26 zanlam ah Kachin ralkap KIA le thuneihnak latu ralkap pawl an kapaw ciamco.

Tanja khua kiangte ah an kapaw ciamco ruangah Tanja khuasung mipi pawl cu hmun dangah an tlan tum, an khua suahnak lamzin ah ralkap pawlin an rak bawh ih zohman tlansuah an siang lo, khuasung ah an kirter sal ih an hringhro. Mipi pawlin an ṭih tuk ruangah tlansuak ngam loin khuasung ah an va lutsal.

Ṭhenkhat rak tlansuak man cu an um, tlansuak man pakhat in “Lamzin ah ralkap pawlin an rak kham ih khua sungah an kirter sal thluh. Kei cu ka rak tlansuak man, ka pate leh pawl cu an tlansuak man lo.

Ralkap in an kirter sal thluh, an parah ziangthil a thleng ding ti an thei lo ih an thinphang tuk” a ti. Khuasung mipi pawl cu innleng khal suak ngam nawn loin an inn sungah an kharhkhum aw thluh.

Ralkap pawlin an inn an urkang sak ding ti an phang ruangah an thinhar zet. Tanja khua kiangte ah ralkap le KIA pawl cu an doaw rero lai ih ralkap lam mithi an tam zet zo, Tanja khua ah inn 100 lenglo aum ih mipum 500 hrawng an khuasa.

Be the first to comment

Leave a Reply

Your email address will not be published.


*