Kachin Ramsung Ah Ziang Natnak Ti Thei Loin Naa An Thi Rero

Kachin State, Tanai Township, ShinBwayYang khua ih naa 8 cu ziang natnak ti theih loin an thi zo, damlo bese khal an um lai. August 25 sun ihsin an damlo thok ih rawl an ei duh nawn lo.

Cutin an kaa ihsin cilthli a suak ciamco ih an thi, naa thi pawl cu naa note lam hlir an si. Naapi pakhat a thi ve, cun naa fate 2 khal an damlo bese zet lai. Siivai an pe nan an dam thei cuang lo.

Shenyang khua ih ramsa sibawi an va ko ih zingzoinak anei rero lai. ShinBwayYang khua in hiti vekih siat an ton hi an veikhat tonnak a si, an khua kiangkap ih naa pawl cu an him lai. Ziangtin hman an um ve lo.

Tualsung mi pakhat in “Kan dung zarh ihsin an dam lo thok, naa fate lakah damlo an tambik. Naa pinu pakhat a tel, atir ahcun an cangvai paih lo. Rawl khal an ei duh nawn lo ih an lei a dang thluh, an kaa ihsin cilthli a suak ciamco ih an thi.

Ahmaisa bik ih a thi mi naa cu zianghman kan rak theih lo ruangah a sa kan ei thluh, neta ih thi pawl cu kan ei ngam nawn lo ih kan phum” a ti. 2014 kum ih cazin vek asilen ShinBwayYang ramsung ah innsang 2,130 zat an um ih mipum 11,453 zat an khuasa.

Be the first to comment

Leave a Reply

Your email address will not be published.


*