Kalay-PDF Miralṭha 3 Ih Ruak An Vuiliam >>>

November 16, 2021 zinglam ah ralkap pawlin Kalay-PDF Battalion 3 sakhan pakhat an va sim ih an kap ciamco hnuah medical team ih nunau 9 an kai. Kalay-PDF sakhan ah nunau 10 le mipa 2 an um, midang cu ralkap pawl do dingin an poksuak.

Mipa 2 hi damlo an si ih medical team pawlin an umpi, culai ah ralkap pawlin an sakhan cu an va kap ciamco ih Kalay-PDF khalin an rak kap ve. Sakhan an lak thei hnuah ralkap pawlin an kaihmi 9 ih zuk cu online parah an tarlang ih mipa 2 le nunau 1 cu an tello, an dinhmun theih a si lo lawk.

November 18 ah Kalay-PDF miralṭha 3 ih ruak cu mipi kilhimtu pawlin an la thei ih hmun pakhat ah an vuiliam. Ram le miphun hrangih nunnak hlantu pawl cu Chin Chin, Mawia le Puia pawl an si. Chin Chin hi English Major kum 3-nak zirlai a si ih khawtlang cangvaihnak khalah an rinsan zetmi a si.

A pa hnenah “Ram le miphun hrangah ka fehsuak ve ding” tin arak ngen ih a pa in, “Neta deuh ah na feh leh ding” tin arak kham. Asinan, Chin Chin in “Ka rualpi leh pawl kaih an tong ih that an tong rero laiah ka rak um men thei lo. Ka feh lo cun a si thei lo” a ti.

Ralkap kutsung ih um lai Kalay-PDF 9 cu November 18 zinglam ah ralkap pawlin hmun dangah an fehpi. Nagar Puk khua ah an fehpi, zing nazi 10:00 hrawngah PDF (Kalay) pawlin Nagar Puk khua ih umhmun khuar ralkap pawl cu an va kap ih tu’khalah an kapaw rero lai. Mipi kilhimtu pawlin Kalay-PDF 9 cu runsuak dingin an zuam rero lai.

Be the first to comment

Leave a Reply

Your email address will not be published.


*