Kalaymyo Ah Ralkap Vanzam In Mi Ṭhenkhat An Thiar

October 11 zinglam nazi 11 hrawngah ralkap vanzam cu Kalaymyo airport ah a ṭum ih mi ṭhenkhat a thiarsuak thu theih a si. Tualsung mi pakhat in “A zamsuah sal caan diktak cu ka thei lo, zinglam nazi 11 hrawng a si. Vanzam cu ara ṭum ih minute 30 hnuah a zamsuak” a ti.

October 10 khalah Kalaymyo airport ah vanzam a ṭum ih minute 30 hnuah a zamsuak sal, vanzam ih a phurmi pawl cu khualtlawng sukso an si lo ding. Kalaymyo ramsung ah ralkap pawl cangvaih nasa an tum ruangah ralkap innsang pawl cu hmun dangah an thiarsuak khal a si thei ti an zum. Ralkap lam cun hliamtuar le damlo pawl an phur thu an rel.

“October 10 simlam nazi 6:24 ah vanzam pakhat ara ṭum. Hivek caan ah vanzam an ṭum dah lo, amak nasa. Cun motor 20 hrawng cu airport ah an lutsuak rero, simlam nazi 6:58 ah vanzam cu a zamsuak sal. A sim zo ruangah ziangvek vanzam ti cu ka thei lo, vanzam meisa tleu lawng kan hmu thei” tin kiangkap um pawlin an rel.

October 8 sun ah Gangaw lam ihsin tank 2 le ralkap motor 40 lenglo cu Kalaymyo ramsung ah an lut, October 9 ah tank 2 le ralkap motor 15 cu Chinram, Tedim lamah an kaiso.

October 10 simlam ah Tedim ihsin Falam lamah an fehsal, October 10 zinglam ah Kalaymyo ihsin ralkap motor 40 lenglo cu Chinram ah an kaiso bet ih boruak cu a sa ut-o lai. Kalay University sung khalah ralkap tam zet umhmun an khuar ih ralthuam picang zetzet an keng.

Be the first to comment

Leave a Reply

Your email address will not be published.


*