Kalaymyo Ah Tank 2 Le Ralkap Motor 40 An Lut, Tualsung Mi Pakhat Ih Ankaa

October 8, 2021 zinglam ah ralkap tank 2 le ralkap motor 40 hrawng cu Kalaymyo khua sungah an lut ciamco thu theih a si.

Tualsung mi pakhat in “Zing nazi 11:00 hrawngah tank 2 le ralkap motor 40 hrawng an ra lut, Gangaw lam ihsin ra lut an si. Kalaymyo airport kiangih RTC sungah an lut thluh, RTC sung ti cu a hlan ih RTC motor pawl tuahnak hmun a si.

A hmunram sung cu a kau tuk, a phardawl khal a sang zet. RTC sungah umhmun an khuar, ralkap ziangzat hrawng an si ding ti cu ka rel thei lo. Mizan khalah Kalaymyo sungah bomb veithum a puak, Airport kiangih um ralkap sakhan kiangah bomb a puak.

Ahlan khalah Kalaymyo sungah ralkap pawl an ra lut ṭheu, ralkap motor truck pawl cu an khuh thluh ih thilri bungrua pawl phur an si men ding. Kalaymyo ramsung ah ralkap sakhan a tam zet, Tamu lam fehnak khalah ralkap sakhan aum.

Kalaymyo cu ramri pakhat a si ih ralkap pawl cu Chin ramsung khalah an va feh thei, asilolen Kalaymyo ramsung an control tum tla a si thei. Tu hrih ahcun security hngehkhoh tuk aum hrih lo, boruak a ziaum lai ih mipi khal a kelten kan tlangleng lai” a ti.

Kalaymyo ramsung ah mipi kilhimtu PDF-Kalay, RKDF le ralkap pawl an doaw ṭheu, bomb puak thuhla khal theih ding aum ringring. October 7 sun khalah PDF-Kalay le ralkap pawl an kapaw ih ralkap lam 12 an thi.

Be the first to comment

Leave a Reply

Your email address will not be published.


*