Kalaymyo, Chinsaing Khua Kiangah Ralkap Pawl Bomb In An Puah Ih 10 Lenglo An Thi, Chinsaing Khua Inn An Urkang

Kalaymyo, Chinsaing le Zinkalin khua kiang tlangleng lamzin kap ih um ralkap pawl cu bomb in an puah. November 18 sun hrawngah bomb in veihnih an puah ih ralkap 10 lenglo an thi tin kiangkap um pawlin an rel. Ralkap pawl cu an thinheng tuk ih Chinsaing khawpawn ih ar vulhnak hmuan le kiangkap inn pawl an urkang.

Tualsung mi pakhat in, “Sun nazi 12:00 hrawngah Chinsaing le Zinkalin khua kiang tlangleng lamzin ih um ralkap pawl cu bomb in veihnih an puah. Cumi hnuah ralkap pawlin meithal an kap ciamco, doaw an si lo ih ralkap pawlin meithal an kap ciamco sawn. Bomb puah ruangah ralkap 10 lenglo an thi, ralkap 15 an thi tin kan thei” a ti.

Bomb puak hnuah ralkap pawl cu Chinsaing khuasung ah an va lut ih zingzoinak an nei, Chinsaing khua lut/suahnak khal an khar. Ar vulhnak hmuan le inn 10 an urkang. Tualsung mi in, “Tlangleng lamzin kiangih ar vulhnak hmuan le inn pawl an urkang, khuasung mipi pawl cun hlaral ihsin kan zoh men, ti thei zianghman kan nei lo” a ti.

November 16 le 17 ah Kalaymyo ramsung ah mipi kilhimtu le ralkap pawl an doaw ciamco ih nihnih sungah ralkap 40 hrawng an thi. Kan dung September 25, 2021 sun khalah Chinsaing le Zinkalin khua kiang tlangleng lamzin kap ih um ralkap pawl cu bomb in an rak puah zo ih cutawk ah ralkap 8 an thi.

Be the first to comment

Leave a Reply

Your email address will not be published.


*