Kalaymyo Doawknak Tualrawn Ah Pyu Saw Htee Pawlin Ralhrang Pawl An Thlun Ngam Nawn Lo, Ting 2 Ciar An Pe Tum Nan An Duh Lo

Kalaymyo doawknak tualrawn ah mithi an tam thei tuk ruangah Pyu Saw Htee pawlin ralhrang pawl an thlun ngam nawn lo, ralhrang pawlin mi pakhat in ting 2 ciar an pe tum nan an duh cuang lo. Kalaymyo, Kyauk Pyut khua hi Pyu Saw Htee pawl umkhawmnak khua pakhat a si.

Ralhrang lamtang phungyi le ralkap ṭuan zo pawlin an kaihruai. Tualsung mi pakhat in, “PDF pawlin in ra that pang ding an ti ruangah tualsung mipi pawl humhimtu ding Pyu Saw Htee an ti. Pyu Saw Htee cu mipi ralkap tin an ruat aw ve, a tir ahcun khuasung lawngah an um.

Neta ah ralkap pawlin ramri thianfainak ah tin an hruaisuak ṭheu, cumi hnuah doawknak tualrawn ah an hruai vivo. Doawknak tualrawn ah meithal an kap ngam lo ruangah ralkap pawlin an hmai ah an beng, an hringhro ih meithal an kapter.

Doawknak ah Pyu Saw Htee tam zet an va thi, hliamtuar pawl khal ralkap pawlin an tuamhlawm duh lo. Mithi an tam thei tuk ruangah doawknak tualrawn ah an thlun duh nawn lo, mi pakhat ah ting 2 ciar pe dingin an lem rero nan zohman an feh duh nawn lo” a ti.

Kalaymyo ramsung ah mipi ralkap PDF pawl an thazang a cak deuhdeuh, Pyu Saw Htee pawl khalin ralhrang hi an zum thei nawn lo. Pyu Saw Htee ihsin suak pakhat in, “Ralkap in doawknak ah in ra thlun asilen ting 2 kan lo pe ding an ti nan an thlun duh lo.

Mithi an tam thei tuk ruangah doawknak ih feh an duh nawn lo. Meithal ih kah ngahmi Pyu Saw Htee cu ralkap in an tuamhlawm lo, siivai zianghman an pe lo. Pyu Saw Htee pawlin ralkap dung an thlun ngam nawn lo” a ti.

Be the first to comment

Leave a Reply

Your email address will not be published.


*