Kalaymyo Ih An Kaihmi Rawlthar Kum 15 Mi A Thi, Kalaymyo Innsang Khat An That

Kalaymyo ih um kum 15 mi Kyaw Min Khant Maung cu June 19 zanah ralkap pawlin an kai ih tuisun June 20 ah a thih thu theih a si.

Vengsung mi pakhat in “Mizan ah ralkap pawlin inn pakhat an lutchilh ih an kap ti kan thei. Cumi hnuah mino pawl an kai vivo, mino 3 hrawng an kai ti cu ka thei.

Mizan ih an kaihmi Kyaw Min Khant Maung cu tuisun nazi 2:00 hrawngah a thi ti kan thei. Mizan zanṭim lai ah an kai, ralkap pawl ih thusutnak hmun ah a thi ti kan thei. A ruang cu a innsang pawlin an la zo” a ti.

Kalaymyo Innsang Khat An That: Kalaymyo, NyaungPinThar vengsung ih um innsang khat cu ralkap pawlin an kap that thluh ih PDF pawl ih cangvaihnak vekin an langter tum ti theih a si.

June 19, 2021 zan nazi 8:30 hrawngah U Win Zaw Oo tei innsang cu an innsung ah TV an zoh, cutin innsung ih an um laiah ralkap pawlin an inn cu an kulh thluh ih an kap. Vengsung mipi pawl cu thlaphang in an rak um.

‘Nan zaten suak uh, nan zaten suak uh’ tin authawm an theih hnuah an innsung ihsin minung 2 an tlansuak ih ralkap pawlin an rak kap that. U Win Zaw Oo tei nupa le an pafa an kap that ih an mikhual nunau pakhat khal an kap that.

An inn ih um nunau pakhat ih mit ah an kap ngah ih siizung ah an tuamhlawm rero lai. Cumi hnuah ralkap pawlin an sui le ngun pawl an laksak ih an tlan lai cu vengsung mi ṭhenkhat in an rak hmu man. Ralkap pawl cun PDF pawl ih cangvaihnak vekin an langter tum ih mithmutu an rak um ruangah thudik cu an thup thei cuang lo.

Vengsung mi pakhat in “Ralkap pawl ih cangvaihnak ti cu mithmutu an um, USDP party cu an si ko nan vengsung mipi pawl thawn an remaw tuk, buainak an nei dah lo. Dalan khal an si lo, kan remaw tuk ih tuitum mipi pawl ih cangvaihnak khalah bawmnak an rak pe ṭheu” a ti.

Be the first to comment

Leave a Reply

Your email address will not be published.


*