Kalaymyo Lam Feh Ralkap Motor In Bomb Kammi An Pal Ngah Ih Ralkap 30 An Thi

August 18, 2021 sun ah ralkap motor 40 lenglo cu Kalay-Gangaw lamzin ihsin Kalaymyo lamah an feh, Gangaw ramsung KanYwa Kyauk Gu ramlak lamzin ah mipi kilhimtu pawlin bomb an rak kam.

Ralkap motor 2 in bomb kammi cu an pal ngah ih an motor puak ah ralkap 30 an thi. Tualsung mipi kilhimtu in “Manisun nazi 1:30 ah bomb kan rak kam, kahawknak cu aum lo.

Ralkap pawl an tamtuk ruangah bomb kan kam hnuah kan tlan, bomb kammi cu an pal ngah ih bomb puak ruangah ralkap tampi an thi. Amal bik ralkap 30 cu an thi” a ti.

Cutin bom kammi an pal ngah ruangah ralkap motor 30 hrawng lawng Kalaymyo lamah an feh, a dang ralkap pawl cu Gangaw ramsung ah an lut ih Hnin Kha khua ah umhmun an va khuar.

Zanlam ah mipi kilhimtu le ralkap pawl cu Hnin Kha khua kiangah an kapaw ciamco ih ralkap pawlin pukpi thawn an kap.

Tuizing August 19 zinglam ah ralkap pawlin khuasung inn ta an duhduh thilri bungrua pawl an laksak ih an motor sungah an ret, cun khua dangih um Pyu Saw Htee pawl khal bike 18 in Hnin Kha khua ah an va lut ih ralkap pawl thawn an komaw.

August 19 zinglam ah ralkap motor 34 cu Gangaw lamah an fehsal ih tu’ah Hanthawaddy ramsung an thleng. Doawknak nasa zet a thleng ding ti an zum ruangah khuasung mipi pawl cu thlaphang in an um ih ramlak ah an tlan.

Be the first to comment

Leave a Reply

Your email address will not be published.


*