Kalaymyo, Taungzalat vengsung, nemi (4) ih um inn pakhat sungah rukru an lut thup ih an bike 4 an ruksak thu theih a si. Himi innsung ah bike 7 aum, inn neitu le innluattu pawl ih bike a si. Bike hlo 4 cu Auto motorcycle 3 le 125 Kenbo pakhat a si. An ruk lo mi bike 3 cu bike ṭha tuk lemlo an si.
Vengsung mi pakhat in, “July 1, 2022 zan nazi 12 ihsin nazi 2 karlak hrawngih thilthleng a si ding. Zinglam nazi 3:00 ahcun vengsung mipi pawl an tho zo, cumi hlan deuh ah a si ding. An ruk mi bike pawl cu bike ṭha hlir an si, Supercard le bike hlun cu an ru lo, an tang” a ti.
Ralhrang in ramsung thuneihnak an lak hnuah Kalaymyo ramsung ah rukru le suamhmang an tam zet, ritheihsii tham mino khal an pung ciamco. Kalaymyo ramsung ah bike hlo thuhla cu thilmak a si nawn lo.
Himi bike hlo thuhla ah mi pakhat in, “Rukru pawlin bike cu an khawng thei dandan in an zuarsuak ding. A san cu mino ritheihsii tham an tam zet, ritheihsii leinak ah bike cu an zuar ding. Ramsung ah daan le dun khal aum nawn lo ih bike hlo hi aum vivo lai ding” a ti.
Leave a Reply