Kantaw Khua In Meisa Bill An Pek Lo Ruangah An Khawsen In Meisa An Mitsak, Khuathim Lakah Rukru An Cangvai Ciamco

Shan State, Nyaungshwe Township, Kantaw khua cu meisa bill an pek lo ruangah ralhrang pawlin an khawsen in meisa an mitsak thluh. An khua cu a thim mepmep ih khuathim lakah rukru pawl an cangvai ciamco ruangah an buai zet.

Tualsung mi nunau pakhat in, “Meisa bill aum lo ruangah meisa in mitsak thluh, kan khua cu a thim mepmep. Khuathim hi caanṭha ah hmangin rukru pawl an cangvai ciamco. Zantinten thilhlo aum ringring” a ti.

November 13, 2021 ihsin ralhrang pawlin meisa an rak mitsak, siizung le Covid-19 damlo tuamhlawmnak hmun pawl khal meisa an mitsak thluh. Hitin meisa an mit thluh ruangah Covid-19 damlo tuamhlawmnak hmun ah damlo thar an la nawn lo thu an phuang.

Khuami pakhat in, “Rukru pawl ih an cangvaih natsat dan cu inn pakhat ih cet tumpi khal zankhat ah an thiarsuak thei, cet hi kg 150, 200 hrawngih rit a si. Cet rit tuk khal zankhat ah an thiarsuak thei cu rukru pawl hi minung an tam zet ding, zantinten innsang pakhat ah mi pakhat cu an duty ringring thlang” a ti.

An khuasung ih thilthleng cu Nyaungshwe palik sakhan le khawtlang hruaitu upa hnenah an sim thei nan zianghman an cangvai lo, curuangah khuasung mipi pawl cu anmahten kilhim awknak ah an tuah.

Tualsung mi nunau pakhat in, “Khua a thim cun ziangtikah rukru ara suak ding, kan inn ah ziangthil an ra ru ding, minung in ra tuahmawh kem maw? ti lawnglawng kan ruat ih zan khal kan itthat thei lo. Kan ṭih tuk, kan khuasung ih thilthleng hi upa pawl khalin an cinfel thei lo ruangah kan thanau tuk” a ti.

Be the first to comment

Leave a Reply

Your email address will not be published.


*