Karen PDF Le Chin CDF In NUG Hnenah Rampum Huap Raldo Ding Thu Than Lohli Dingin An Dil

June 4, 2021 ah NUG Press Conference hmaisabik an nei ih Defense Minister Daw Khin Ma Ma Myo in raldonak an nei cing ding thu a rel. Daw Khin Ma Ma Myo in “Tu dinhmun ah rampum huap mipi kilhimtu People Defense Forces (PDF) kan dinfel zo.

An umnak ramsung ih tlangpar hriamkai pawl hnuaiah an cangvai vivo ding. Tui dinhmun ah zo in hruaitu a ṭuan ti a thupi lo, kan ral a si mi thuneihnak latu ralkap pawl kan nehnak hi a thupi bik.

Hmuntinkim ah ralkap pawl dotu ding pawlkom an um a ṭul, NUG cozah in caan a thleng tikah Myanmar rampum huap raldo dingin thu kan lo than ding. Cutik ah kan zaten ralkap misual pawl kan dotlang ding” a ti.

Ziangtik ah rampum huap raltho ding thu an than ding ti cu theih a si hrih lo, tu hrih ahcun Karen PDF le Chin CDF in ralkap pawl an do rero lai. Hmun dangdang ih um ralkap pawl cu an koaw khawm ih Karen ramsung le Chin ramsung ah umhmun an va khuar vivo.

Karenni People Denfense Force (KPDF) in “NUG ih thuthanmi ruangah thazang kan ngah tuk, a takram ih an phuang lohli ding kan besei. An phuang lohli asilen kan thilrit phurmi khal a zangkhai ding, rampum huap ih kan do asilen ralkap pawl cu kan neh lohli ding” an ti.

Chinram, CDF-Mindat khalin “Rampum huap raltho ding thu an than lohli asilen kan hrangah thawthaw a ziaum ding, rampum huap ih raldo ding caan cu kan hngakhlap tuk” an ti.

Be the first to comment

Leave a Reply

Your email address will not be published.


*