Karen Ralkap Pawlin ‘KNDF In Kahcawlhnak An Phuang Mi Ah Kan Tello, Ralkap Pawl Kan Do Vivo Ding” An Ti

June 15 ah Karen hriamkai ralkap pawl finkhawmtu KNDF in “Mipi in an tuar tuk ruangah camkhat sung kahcawlhnak kan nei lawk ding” tin thu an rak phuang. Karenni Nationalities Defense Force (KNDF) cu Karen hriamkai ralkap pawl finkhawmtu a si ih a sungah pawlkom dangdang an umkhawm.

Camkhat sung ralkap thawn kahcawlhnak nei tum pawl cu hriamkai pawlkom pathum Karenni National People’s Liberation Front (KNPLF), Karenni National Peace and Development Party (KNPDP) and Kayan New Land Party (KNLP) an si.

1990-2000 sungah ralkap thawn lungrual in kahcawlhnak an rak nei zo ih ralkap pawl bawm in doawknak khalah an tel ṭheu.

KNDF thuphuangtu in “Kan finkhawm awktu pawlkom hmin in ca an suah nan zianghman kan thei lo. Kayah Li Phu group khalin zianghman an rak thei ve lo ih an cohlag lo thu an phuang zo, ralkap pawl kan do vivo ding. KNDF sungih um hriamkai mino pawl khalin kahcawlhnak thuhla cu an dokalh a si” a ti.

KNDF member pakhat in “KNPLF le KNPDP cu ramri hriamkai an si, KNLP telin ralkap pawl thawn meeting an rak nei ih an hmin in meeting an kai lo. KNDF hmin in meeting an kai, KNDF aiawh ih meeting kai khal an si lo. Kannih mino pawlin zianghman kan thei lo” a ti.

Karen hriamkai dang pawlin kahcawlhnak phuangtu pawlkom 3 thawn meeting kan nei ding, KNDF sungtel zaten lungkimnak tello ih meeting an va kai ruangah thurel tlangnak kan nei ding tin an tarlang.

Kayah Li Phu Youth Central Committee in “Statement an suahmi ah kan tel thluh lo, hmun dangdang ih um kan si vekin kan dinhmun khal a bangaw lo. An statement suahmi cu hmunkhat hrang lawng a si ih hmun dang a tuam thluh lo. Kahcawlhnak thuhla an phuang mi ah kannih thawn a saiaw lo, ralkap pawl kan do vivo ding” an ti.

Be the first to comment

Leave a Reply

Your email address will not be published.


*