Kawlram Ah Tleirawl Kum 14 Mi In Nauhak Kum 6 Mi A Pawngsual

Rakhine State, Kyaukpyu khua ah nunau nauhak kum 6 mi cu mipa tleirawl kum 14 mi in a duh lo nacingin a sualpi thu theih a si. June 20, 2022 simlam nazi 4:00 hrawngah Kyaukpyu vanzam kerawn kiangih tikuang ah tak an kholh.

Tikuang kiangkap ih an lek rero laiah nauhak te cu an vangsung ih um tleirawl in a sualpi. Cumi hnuah tualsung palik sakhan ah an theihter, tleirawl kum 14 mi cu an kai ih thu an sut.

Palik sakhan ih į¹­uanvo neitu in, “Thubuai an tuahsak lo. Thubuai an tuahsak lonak cu tiva ah nauhak pawl takkholh laiih thilthleng a si ruangah an ti.Tak an kholh laiah an lek ih palang kuai in an dengaw an ti. An thuhla cipciat cu kan thei hrih lo” a ti.

June 21 sun ah nauhak te cu siizung ah zohdiknak an tuah ih siibawi pawlin pawngsual a si thu an nenhnget. Sun nazi 2:30 hrawngah palik sakhan cu an hei phone sal ih thuhla an sim thei tum nan phone kaitu an um lo.

An thuhla buaipitu U Than Hlaing in, “Sual tuahtu hi an hrem theinak dingah hmai kan nor vivo ding. Nauhak daan le dun vekin hremnak pe ding an si. Siizung lam ih an zohdik hnuah sualpi a si ti an theifiang zo. Nauhak te khalin thilthleng dan ziangkim a rel thei thluh, pawngsualtu cu mi pakhat lawng a si” a ti. Tuahmawh tong nauhak tei hi innsang harsa zet an si.

Be the first to comment

Leave a Reply

Your email address will not be published.


*