Kawlram Fala Pawngsualtu Thailand Motor Mawng Cu Kum 13 Sung Thawngtla Dingin A Thu An Ṭhencat

Kawlram fala kum 17 mi cu Thailand ram Bangkok khawpi ah hnaṭuan dingin daan lon a lut thup ih a nute tei inn ah aum. A nute hi Thailand ṭong thiam a si, a nute in Facebook cahmai ah hnaṭuannak an hawl thu a tarlang ih Thailand taxi mawng kum 39 mi Adirek Sae in a bum.

Kan dung April 1, 2022 simlam ah hnaṭuannak ah hruai dingin ava phur ih riahbuk ah a lutpi hnuah a pawngsual. Hridai in a tawnbet ih a hringhro, a sualpi laiah video in a zuk bet. A phone le a sumpai kenmi baht 500 khal a laksak.

Kawlram fala hi Thailand ṭong thiam lo a si, Adirek Sae in palik sakhan ah ava hruai ih daan loin ramsung lut thup a si tin ava hek bet. Adirek Sae cu a tlan hnuah Thailand palik pawlin ṭonglettu an ko ih fala cu thu an sut, a parih thilthleng pawl cu a phuangaw ih Adirek Sae khal an va kai.

Kawlram fala cu daan lo ih Thailand ramsung lut a si nan hremnak zianghman an pe zik lo ih siizung ah an tuamhlawm.

Thailand taxi mawng Adirek Sae cu August 2, 2022 sun ah court in kum 15 sung thawngtla dingin a thu a ṭhencat nan a thilsual tuahmi hi a phuangawk ruangah kum 2 cu an thumsak ih kum 13 le thla 9 sung thawngtla dingin a thu an ṭhencat. Zangnadawmnak ah baht 351,760 pe dingin hremnak an pe.

Be the first to comment

Leave a Reply

Your email address will not be published.


*