“Khami Hotel Ah Ka Riak Ngam Nawn Lo”, Thla !!!

Malaysia tlangval kum 28 mi ih thilton a si. “Klang factory pakhat ah siivai lam tuahtu ka si, 2016 kum ah Johor Bahru ah training kai dingin ka rualpi 2 thawn kan va feh. Sunivu in training kan kai hnuah zanlam nazi 6:00 ah kan thlennak hotel ah kan va feh. Hotel cu cangkang tuk a si lo ih a building khal a upat hmel nawn.

Kan cau tuk ruangah kan it lohli, ihkhun pahnih lawng aum ih kei le ka rualpa pakhat cu ihkhun pakhat ah kan ittlang. Ka rualpa pakhat cu amahten ekinn kiang ihkhun ah a it, kan ke zawn ah thlalang tumpi aum ih kan hmuaw thei. Kan cau deuh thawn kan it that lohli, zan laiah ka thangharh thutthi ih kan room sung boruak cu a rit tuk.

Thildik lo aum vekin ka thei, ekinn kiangih it ka rualpa cu ka vun zoh ih a kiangah nunau pakhat arak ding ziarziar ih arak zoh ringring. Nunau cu tawl sang a si ih a sam khal a hnok liallial, cangloten ka rualpa it that lai cu arak zoh ringring.

Ka ṭih tuk ih ka zoh ngam nawn lo ih puan in ka lut ka khuhaw, ka ṭih tuk ruangah ka itthat thei nawn lo ih ka vun bihsal ih nunau cu arak um nawn lo. Nazi ka zoh ih zinglam nazi 3:00 ciahciah a si, kan ke lamih um thlalang cu ka vun zoh ih ka lu tlun ciah ah nunau cu arak ding ih in rak zoh ringring lai ka hmu thutthi cu ka lau tuk.

Thla ka cam tum ih ka cam thei lo, ka mit ka sing ringring hnuah ka mengsal ih arak um nawn lo. Ka rualpi 2 cu ka zoh ih an rak itthat thaw tuk lai, room sungah ka um ngam nawn lo ruangah ka phone le ka hnipuan pawl ka la ih hotel huailam ah ka va tum ih lobby ah ka it. Zinglam nazi 6:30 ah kan room ah ka va fehsal ih zianghman thilthleng lo vekin ka um hnuah training kai dingin kan poksuak sal. Asinan, khami hotel ahcun ka riak ngam nawn lo”.

Be the first to comment

Leave a Reply

Your email address will not be published.


*