Khamzim Ah A Nupi Naupai Lai Ih Biang Ah A Hnam Ih “Hellram Ah Feh Aw!” Tin A Nam Tla

Thailand, Pha Taem National Park sungih thilthleng hi a rapthlak zet. Thailand ramsung ih um China nupa tuakkhat cu June 9, 2019 ah Pha Taem National Park sungah an va feh ih nuam an cen tum. An hmin cu Yu Xiaodong le Wang Nan a si, Wang Nan hi naupai lai a si ih a naupai cu thla 3 a kim zo.

Khamzim ah an tlangleng rero ih zing nieng mawi suak lai an cuan, Yu Xiaodong in a nupi cu avun kuah ih a biang ah a hnam hnuah a hna kiangte ah, “Hellram ah feh aw!” tin kham par ihsin a nam tla ṭhutṭhi. Vansiatnak lakih vanṭhanak an ti vekin thingkung parah a tla hmaisa ih cutin lungto parah a sawh aw ih a thi lo, nazi 1 sung a talbuai hnuah kiangkap ih mi vaksuak pawlin an hmu ih siizung ah an tlanpi lohli.

A pasal Yu Xiaodong khal siizung ah ava tlan ve ih a nupi cu kham par ihsin amahten a tlasual pang, ka um lo sungah arak tla a ti. A nupi kiangah a to ringring ih a nupi hnenah, “Hitawk ih um pawlin China ṭong an thei lo, CCTV khal aum lo. Palik pawlin thusut ding lawngin in ko dingih ka rasal ding, na phuangsuak asilen ka ra lo that ding” tin a hringhro ruangah Wang Nan in a thilton cu a phuangsuak lohli ngam lo.

Ni 5 hnuah a pasal um lo sungah a parih thilthleng cu sibawi hnenah a sim thei, cun a rualpi pawl hnen khalah a sim thei. A rualpi pawlin a ihkhun kiangah aw record-nak cette an ret thup, cutin Yu Xiaodong ara sal ih a nupi a hringhro, kham par ihsin a namtlak thu khal a ṭongsuak. Aw record-nak in arak record ngah thluh ruangah Yu Xiaodong cu tetti kimcang thawn an kai, a nupi a namtlaknak a san khal a nupi ih sumpai a duh ruangah ti an thei.

Game leknak ah leiba tampi anei ih a nupi hnenah sumpai a dil nan a nupi in a pek duh lo ruangah a sumpai pawl laksak tum in a nupi cu kham par ihsin a nam tla. Yu Xiaodong cu Thailand palik pawlin an kai ih damsung thawngthlak le zangnadawmnak ah 1.1 million yuan (US$170,000) zat pe dingin a thu an ṭhencat, asinan Yu Xiaodong in a thuhla cu relsal dingin ca a thehlut ve.

Kum 2 a liamzo nan Wang Nan cu a damṭha thei hrih lo, a hliamtuar hi a nasa tuk ruangah a pum sungih naute khal sibawi pawlin an rak hlonsak. A ruhcang hi hmun 17 rori a kiak ih surgery khal vei tampi an tuah, kum 33 mi Wang Nan in, “Ka khuaruahnak cu a ṭha zo nan ka taksa hi a ṭha thei hrih lo, ka ruahnak le ka taksa hi hmun dangdang ah an um. Yu Xiaodong hi napin hremnak pe hai sehla ka duh, ka fate a that” tin South China Morning Post hnenah a sim thei.

July 2017 kum ah Bangkok khawpi ah an rak tongaw ih theiaw ciangkuang loin thla 2 hnuah an neiaw hngal. An tongawk hnu ni reilote ah Yu Xiaodong in neiaw dingin a sawm cih, nitinten rori a sawm ruangah Wang Nan khalin arak “Aw”. Wang Nan in, “Kan theihawk pekte ahcun a fel tuk, ka hmailam hrangah pasal ṭha zet a si ding tin ka rak ruatsual.

Zingtinten kan inn ah ara ih breakfast thaw zetzet in tuahsak ṭheu, lenglam kan vahsuah tik khalah bill man ka pek hlanah amah in arak pe man cingcing. Sumpai lam khalah neinung zet vekin aum, ka rualpi pawl khalin an fak rero ṭheu, in ngaihsak thei tuk. Kum 2 hnu lawngah a mizia ngai ka thei, hnaṭuan paih lo a si ih lawngkasa a lek ringring.

Lawngkasa ih a leiba pawl cu in kuanter, in hringhro ṭheu. 2019 kum thok ah lawngkasanak ah leiba 2 million yuan (US$309,000) zat anei ih in pekter ruangah ka beidong tuk. Himi ṭum ahcun a hrek lawg ka peksak ih a dang cu nangmahten tumaw ve aw ka ti ihsin kan buai thok. That in tumnak khal ka sumpai a duh ruangah” tin thu an sutnak ah a sim thei.

An nupa karlakah hiti vek thil rapthlak zet a thleng nan an umnak China, Jiangsu court in ṭhenawk an siang lo. Ṭhenawknak ca an tuahsak duh lo ih a pasal Yu ih thuhla hi Thailand court in a relsak sal asilen ṭhenawknak ca kan lo tuahsak ding an ti. China ramsung ah sumpai ruangah mai nupi that thuhla hi theih ding a tam zet zo.

Wang Nan cu media pawlin duhdawtnak hi na zum thei lai maw? tin an sut ih Wang Nan in, “Pathian in ka hrangah mipa pakhat in pesal asilen duhdawtnak hi ka zum ko. Asinan ka fimkhur thlang ding, an sulhnu le an thuhla a cipciar ih ka theihfiang hnu lawngah ka cohlang ding” a ti.

Be the first to comment

Leave a Reply

Your email address will not be published.


*