“Khaw A Thim Cun Nauhak Pawlin Ka Pa Teh Tin An Hlam Ṭheu Ih Simdan Ding Ka Thiam Lo” Tin Sunghno Nui Mitthli A Luang

December 24, 2021 ah ralhrang pawlin khuasung mi 35 cu hridai in an tawnbet ih an nunglai in an urthat thluh, a thaisun cu Christmas sun a si nan an tantami an innsang pawl cu lungkuai in an ṭap rero.

Kayah State, Phuso ramsung ah ralhrang pawl cu an va lut ciamco ih sualnak neilo khuasung mi pawl cu an urthat. Cumi lakah pacang pakhat a telve. A tantami a nupi in, “Zinglam ah a naule 3 thawn thawlagyi motor in an poksuak, ramlakah rua la dingin an feh. Ka pasal hi thawlagyi motor mawngtu a si.

An poksuak hnu reilote ah ralhrang pawl an ra thleng ti kan thei ih ka pasal cu ra tlung lohli dingin ka phone. Asinan lamlakah ralhrang pawl an rak kai ih hridai thawn an tawnbet hnuah an urthat” tin mitthli thawn media hnenah a sim thei.

Innsang pabik aum nawn lo ruangah a hringnun cu tipithuamthum laifang ih talbuai rero lai vek a si, an khua khalah an um ngam lo ih ramlakah an tlan rero lai. Innsang nu in, “Ziangtin ka fale pawl ka cawm ding ti khal ka thei lo. Khaw ara thim cun ka fale pawlin ka pa teh khuiahso aum? tin in sut ṭheu ih simdan ding khal ka thiam lo” tin a ṭap rero.

Be the first to comment

Leave a Reply

Your email address will not be published.


*