Khua Lal In Nunau A Sualpi Ṭheu Ih, “Nan Relsuak Asilen PDF Tin Ka Lo Kaihter Ding” Tin A Hringhro

Mandalay Division, Pyawbwe Township, Yanaung khua lal U Thein Aung in nunau a sualpi ṭheu ih, “Nan relsuak asilen PDF tin ka lo kaihter ding” tin a hringhro thu theih a si. U Thein Aung cu ralkap lamtang khua lal a si ih a fapa khal ralbawipi a si.

Khuami pakhat in, “A fapa hi ralbawipi a si ruangah ziangkim a tuah thei thluh, a hmeltheih le amah thawn pehtlaih awtu pawl cu hmunram lawngah dawr khan a tuahter. Cun midang hnenah sumpai a hmangter ṭheu, sumpai an pe kirsal thei lo asilen hotel ah a hruai ih a sualpi.

An ṭih thei zet nan a hruainak hmun ah an thlun, midang hnenah relsuak hlah uh, nan relsuak asilen PDF tin ralkap hnenah ka lo kaihter ding a ti, nunau tam zet ih nun a siatsuah zo. Amah ruangah PDF an kaihmi khal an tam tuk zo, zokhalin a thuhla cu an thei thluh” tin media hnenah a sim thei.

U Thein Aung cu a fapa ralbawipi a si ruangah a vok lal len, khuasung mino pawl khal PDF tin a hek ih a kaihter hnuah ralhrang pawl thawn an ṭuantlang ih mi pakhat ah ting 3 in an tlensuahter ṭheu.

Media pawlin amah U Thein Aung cu an be pawp ih U Thein Aung in, “Kei cu khua lal ka si ih hivek thil zianghman ka tuah lo. Ka thuhla pawl zoin an lo sim thei ti in sim uh, ka thei duh. In thangsiat a si, khua lal ka si vekin daan le dun thawn ka um. Ka thuhla hi thuthang ah nan suah asilen tlunlam ah ka lo report ve ding. In thiktu pawlin ka thuhla hi diklo zetin an rel” a ti.

Be the first to comment

Leave a Reply

Your email address will not be published.


*