Khuabawi Hlun An That Ruangah Khuabawi Ihsin A Bang Ve

Kachin State, Mohnyin Township, Nan Mar khuabawi hlun Aye Min cu June 1 sunah zo ti theih loin an kap that. Aye Min cu ralkap lamtang USDP party member a si ih 2005-2012 sung khuabawi arak ṭuan.

A thih hnu ni 3-nak ah khuabawi ṭuanlai Myo Yarzar in khuabawi ihsin a cawlh thu a phuang. Myo Yarzar cu mifel le miṭha zet a si ih National League for Democracy (NLD) cozah laiah khuabawi arak ṭuan, cun ralkap in thuneihnak an lak hnu khalah khuabawi cu a ṭuan bet vivo.

Tulai Myanmar ramsung ah ralkap kuthnuai ih khuabawi ṭuanlai pawl an that rero ruangah Myo Yarzar in khuabawi ihsin a cawlh thu a rel.

Myo Yarzar in “Khuabawi pawl an that rero zo, innsang nei ka si ruangah ka thinphang. Ka cawlhnak san pakhat khal a si, ka mipi pawl thilṭha lo an tuah ding ka duh lo. Mipi lamah ka um, mipi in ralkap uknak an duh lo. Mipi duhnak cu kan thlun ve a ṭul, mipi duhlomi uktu hnuaiah hna ka ṭuan thei nawn lo” a ti.

Myo Yarzar cu mipi ih an duhzet mi khuabawi a si, amah lawngin Nan Mar ramsung ah veng 5 ih lal a ṭuan, a lal ṭuannak veng pawl cu Shanzu, Myoma Yan Aung, Nam Thaya, Chaung Tar le Nyaunggon pawl a si.

Khuasung mi pakhat in “Misual a si lo, mipi khalin an hua lo. Mipi hrangah hna a ṭuan ringring, Covid-19 thlisia hrang lai khalah volunteer in damlo pawl arak kilkhawi rero zo. Myo Yarzar cu a sen le a hring khal a si lo” a ti. A sen le a hring a timi cu NLD le USDP a ti duhnak a si, asinan tulai khuabawi pawl an that rero ruangah arak hnukdawt aw cia.

Be the first to comment

Leave a Reply

Your email address will not be published.


*