Khuasung Mipi Ruangah “Dragon Warrior” Pawlin Mandalay Khawpi An Suahsan, An Riahsiatnak An Tarlang

Mandalay khuasung ih cangvai ṭheutu mipi ralkap Dragon Warrior MDY- PDF cu tualsung mipi pawl ih tlanlendan ruangah khawpi an suahsan.

Dragon Warrior in, “Dothlennak cu mah thawn pehtlaihaw lo vek, theilo vek ih umtu an tam ruangah khawpi kan suahsan. Tualsung mipi pawl thin daiten ralkap sal ah um thlang uh.

Mandalay khuasung ah kan um thei nawn lo ruangah kan suahsan a si, neta ah nehnak thawn Mandalay khawpi ah kan ra kirsal duh lai” tin an tarlang. Dragon Warrior pawl hi Mandalay khuasung ih ralhrang pawl do ṭheutu pawlkom pakhat an si.

May 3 zinglam ah hliamtuar ṭhenkhat cu Green Day Inn ah an va lut. Ralhrang lamtang pawlin ralhrang hnenah an sim thei ih Green Day Inn cu an kulh thluh hnuah an kapaw ciamco. An kahawknak ah mipi ralkap mipa (2) le nunau (1) an thi, pakhat cu meithal kahnak hliamhma thawn an kai.

Mandalay ramsung ah ralhrang pawlin mino an kai rero, culai ah ralhrang lamtang ‘Thisen In’ pawlkom thar a suak ih NLD sungtel le tualsung mino pawl an that, an kai ṭheu.