KIA Le PDF An Komaw Ih Ni 4 Sung Ralkap Pawl An Donak Ah Ralkap 180 Lenglo An Thi

Sagaing Division, Katha Township kiangkap ah Kachin ralkap KIA le mipi kilhimtu PDF pawl an komaw ih thuneihnak latu ralkap pawl an do rero lai. Ni 4 sung an doawknak ah ralkap lam 180 lenglo an thi ih hliamtuar bese zetzet khal an tam.

Ralkap thi lakah ralbawi khal an tel tin tuisun July 10 ah PDF pawlin an phuang. July 5 zan nazi 9:00 hrawngah duty in ralkap pawl an vakkual ih KIA le PDF pawl ih kammi bomb an palpuak ruangah ralkap 10 lenglo an thi.

July 6 zinglam nazi 5:00 hrawngah ralkap tam zet an va poksuak, ralkap motor 3 in an poksuak ih Kauk Kwe tiva an thleng zawngah KIA le PDF in pukpi, RPG in an rak kap ciamco ih ralkap 100 tonak motor 2 cu an kap puakdarh.

Cutawk ih an doawknak ah ralkap lam 60 hrawng an thi ih hliamtuar khal an tam zet, ralkap motor 1 cu a tlansuak thei. July 7 zinglam nazi 10:00 hrawngah ralbawi picang in ralkap pawl hoha in an va poksuak sal ih mipi lam kammi bomb 4 an palpuak ruangah a hmun ah ralbawi telin ralkap 30 hrawng an thi.

July 9 sun ahcun ralkap pawlin tlunlam le hnuailam ihsin an dorawn, doawknak vanzam 4 in an kap ciamco ih PDF lam 3 an thi ih 3 cu an thuhla theih ding um loin an hlo lai. KIA ralbawi pakhat khalin ram le miphun hrangah a nunnak a hlan. July 9 sun ih an doawknak ah ralkap lam 50 hrawng an thi ih 70 hrawngin hliam nazet an tuar.

July 9 zanlam ah ralkap motor ke 4 nei pakhat le Double Cub 1 motor pakhat in ralkap pawl an poksuak. KPDF le KIA pawlin bomb, pukpi thawn an rak kap ciamco ih ralkap 30 hrawng an thisal. Ralkap pawlin an mithi ruak cu a remrem nak ah an phum hluahhlo ih hliamtuar thi zikte pawl cu lawngin hmun dangah an thiar.

Be the first to comment

Leave a Reply

Your email address will not be published.


*