KIO Chairman In, “Hriamkai Pawl Mipi Parah Kut Thlak Hlah Uh” A Ti

Kachin Independence Organisation (KIO) Chairman Gen N’ban La in kumthar sun ah, “Hriamkai pawl mipi parah kut thlak hlah uh, ralhrang thawn direct ih pehtlaihaw mi an si lo ahcun kut thlak hlah uh. Mipi umkhawmnak hmun siizung, tlawnginn pawl khal siatsuah nawn hlah uh. Diknak thawn hnaṭuan uh law, minung covo siatsuahnak in cangvai hram hlah uh” tin thucah tawi anei.

Kachin hriamkai pawlkom pawl kaihruaitu KIO hnuaiah Kachin Independence Army (KIA) an um, KIA cu Kachin le Shan ramsung ah umhmun an khuar ih ralhrang pawl thawn an doaw ṭheu.

Ralhrang in ramsung thuneihnak an lak hnuah cozah hnaṭuan pawl cu ralhrang kuthnuai ah hna an ṭuan duh nawn lo, cumi hnuah ralhrang pawlin CDM tuahtu pawl cu a phunphun in an hringhro ih hna an ṭuanter sal.

June 2021 ah Bhamo District, Momauk khua ih tlawnginn cu ralhrang thulung in tlawng an kai ruangah tualsung mipi kilhimtu pawlin bomb in an puah. Tualsung PDF pawlin ralhrang thulung in nauhak pawl tlawngkai tertu nulepa hnenah ralrinnak an pe.

November 2021 ah Mawsizar khua ih tlawnginn ah bomb an puah ih tlawng sayama pawlin hliamhma an tuar, tlawnginn khal a siat. Curuangah KIO in a kuthnuai um KIA hnenah tualsung mipi kilhimtu PDF pawl cu nunsim dingin an fial. Kachin ramsung ih PDF pawl cu KIA kuthnuai ah training kai an si tlangpi ih ralhrang pawl khal an dotlang ṭheu.

Be the first to comment

Leave a Reply

Your email address will not be published.


*