Ko Maung Aye Tei Nupa Cu Bazar Ihsin An Tlung Lamah Ralkap Pawlin An Rak Kap That Ih An Sumpai An Laksak

Sagaing Region, Shwebo District, KanThit khua ih um nupa tuakhat cu Khin Oo khua ah hanghnah hangrah siivai an va zuar ṭheu.

Augsut 21 zan nazi 8:00 hawngah kum 35 mi Ko Maung Aye le a nupi kum 36 mi nurse ṭuanlai Ma Nwe Nwe cu an khua lamah an tlung. Lamzin ah ralkap pawl thawn an tongaw ih an kap that, cun an sumpai 1,470,000 zat khal an laksak.

An ruak khal an la ih a thaizing ah an innsang pawl hnenah an ruak ra la uh an ti. Ko Maung Aye cu a cal ah an kap ngah ih a nupi cu a pum ah an kap. Cun, an hmai khalah meithal tawko ih sawhnak hliamhma an tuar.

August 22 ah an innsang pawlin an vuiliam. Ko Maung Aye tei nupa in fanu kum 3 mi an thihsan. An sungkhat pakhat in “Hnaṭuannak ihsin an ra tlung, zandang khalah himi caan hrawngah an ra tlung ṭheu.

Mizan ahcun ralkap pawl thawn an tongaw ih an kap that, an ruak kan va lak laiah an sumpai 70,000 zat cu in pesal. Ting 14 cu in pe nawn lo, sumpai an duh ruangah an that si ko ding. Ralkap pawl cun ‘meithal in in kap hmaisa ruangah kan kap ve’ an ti. Mipangai te an si ih meithal khal an nei lo, an kahnak ding san khal aum lo” a ti.

Tualsung mi pakhat in “Khin Oo ih palik 2 cu an meithal pawl thawn an tlansuak ruangah ralkap pawlin an hawl. Zanah meisa an mit thluh ih uico ralkap pawlin an hawl rero, cutawk ah bazar kai nupa thawn an tongaw ih ralkap pawlin an pa cu an kap. A nupi khal a tlan ih an kap that, an hmun ah an thi veve. Meithal kaptu uico ralkap pawl cu zu an ri tuk, an sumpai ting 14 khal an laksak, mithi nupa in an fanu kum 3 mi an thihsan” a ti.

Be the first to comment

Leave a Reply

Your email address will not be published.


*