Kum 10 Sung A Room Sungah A Fala Arak Thup

India, Kerala ramsung ah thuthang danglam zet a darh ciamco. February 2010 kum ah Palakkad district, Ayilur khua ih um fala kum 18 mi Sajitha cu a rualpi tei inn ah leng dingih a suak ih a hlo lanta.

A nulepa in palik hnenah an report ih an hawl rero nan an hmu thei nawn lo, cutin a innsang le an khua mipi pawlin a thi zo ah an ruat. Asinan, an inn kiangte ih um a tlangval Rahman hneah arak um ringring.

Cutawk laiah Rahman cu kum 24 mi a si ih Sajitha thawn an duhaw ti zohman in an thei lo, an innsang pawl khalin rinhlelnak an nei lo. Rahman cu electrician a si ih a thiamthil hmangin a room cu a phit thluh, a innsang pawl khal a room sungah an lut thei lo.

Cun, a room sangka kiangte ah electri hri a ret ih aum lo sungah an rak lut tum asilen electri in a laih ding. A nulepa in a cangvaihdan danglam an rak ti thei zet, a thluak lam a kim nawn lo si ding an rak ti.

A san cu a room sung lawngah rawl a ei ṭheu ih a hlan ih a rawlei aiin a ei tam sawn, a hlan ih a ei/in duhlomi pawl khal a ei/in duh thlang ruangah a innsang pawlin mak an ti thei zet. An theihsuahdan cu Rahman khal a hlo thutthi, thla 3 hrawng a hlo zo ih a innsang pawlin an hawl rero.

A hlo ngai siloin a fala cu hruaisuak in hmundang ah nunthar an rak din sawn a si. Rahman cu truck mawngin sumpai a hawl ṭheu, a truck mawng lai cu a naupa in arak hmu ngah ih a dingter nan a ding duh lo ih a tlanlan.

Cutin, a naupa in palik hnenah a report ih an zingzoi vivo hnuah an kai ngah. Rahman in kum 10 sung a fala arak thup zo ih an tlanhlo thu a phuangaw, a fala arak thupnak cu an innsang veve in neihawk an siang lo ding ti an phang ruangah a si. An thuhla cu court in a buaipi rero lai ih ziangkim an sinpi hmel a bang.

Be the first to comment

Leave a Reply

Your email address will not be published.


*