Kum 20 Sung Thawngtla Dingin A Thu An Ṭhencat

Magway, Sidoktaya khua ih um innsang nu kum 30 mi Ma Hnin Moe Khaing cu ralhrang pawlin an kai ih June 10, 2022 ah kum 20 sung thawngtla dingin a thuhla an ṭhencat. A pasal Ko Bo Min Ko cu NLD party sungtel a si ih mino pawl kaihruaitu a si.

Ko Bo Min Ko cu mino pawl lamzawhnak ah hruaitu a si. Nikum July 1, 2021 ah Ko Bo Min Ko cu ralhrang pawlin kaih an tum, an inn ah an va lutchilh ih arak um lo ruangah a nupi Ma Hnin Moe Khaing sawn an kai. A nupi Ma Hnin Moe Khaing hi fa nei pekte a si ih a fate hnawitii a pek laiah ralhrang pawlin an va kai.

An sungkhat in, “An inn ah an kai. An kaih tummi a pasal Ko Bo Min Ko cu aum lo, a nupi naute hnawitii pek lai sawn an kai. Naute khal sakhan ah an hruai nan a tapa in naute cu ava lasal” a ti.

Ma Hnin Moe Khaing ih fahniang cu a tapa in arak kilkhawi, asinan a tapa khal ralhrang pawlin tuikum April thla ah an va kai ih a fahniang cu kilkhawitu anei nawn lo, venghnen pawlin an kilkhawi sung. Ma Hnin Moe Khaing ih tapa cu ke ṭha lo a si. Ma Hnin Moe Khaing ih pasal cu tuini tiang an kai ngah hrih lo.

Ralhrang pawlin Ma Hnin Moe Khaing cu dothlennak ih tel tin thubuai an tuahsak ih pakmah 50, pukmah 52 hmangin kum 20 sung thawngtla dingin a thu an ṭhencat. Ralhrang pawlin ramsung thuneihnak an lak hnu ihsin May 5, 2022 tiangah NLD sungtel 917 an kai ih mi 216 cu an suahsal, midang 701 cu tuini tiang thawnginn sungah an khum lai.

Be the first to comment

Leave a Reply

Your email address will not be published.


*