2022 Kum Kan Hmang Thok Zo Nan Ethiopia Ram Ahcun 2014 Kum An Hmang Rero Lai

Leitlun ramtinkim in calendar an nei thluh, Myanmar ram khalin calendar anei ve ih Burmese Era (BE) tin an ko. China pawl khalin calendar an nei ve ruangah kumtinten Chinese New Year cu January 21 – February 20 kiangkap hrawngah an hmang ṭheu.

Leitlun ramtinkim ah mah leh cio in calendar cu an nei thluh nan Mesopotamia miphun pawl ih tuahmi calendar hi an hmang tlangpi, Mesopotamia (The Sumerians) pawl ih tuahmi calendar cu Julius Caesar hi a remṭha ih an hmang vivo.

Tu’ah 2022 kum kan hmang rero lai nan Ethiopia ram ahcun 2014 kum an rak hmang lai, Ethiopia ram hi leitlun ih ram upa bik pakhat a si. Tu ih kan hmanmi calender hi an hmang duh ve lo, Catholic Church in calender fehdan cu Jesuh a suah hnu ihsin 500 AD tin an hmang thok ih Ethiopian Orthodox Church in cumi cu an cohlang lo.

An calender cu kan calender hmanmi aiin kum 7 le thla 8 in a muang sawn ih kumkhat sungah thla 13 an nei. Ethiopian miphun cu midum an si nan Israel miphun khal an um thotho, Siangpahrang Solomon va tongtu Sheba Lalnu kha Ethiopian rammi a si ih Solomon thawn fapa an nei.

An fapa hmin cu Menelik ti a si ih a hmin san cu Mifim Fapa tinak a si, Menelik cu a pa Solomon hnenah ava tlawng ih a tlunlam ah Solomon in Israel mi ṭhenkhat thawn a thlahliam. Cutawk ah Moses ih daan 10 ngannak lungphek cu Solomon kutsung ta an rak ruksak ih a lem an ret.

Curuangah Ethiopian ram ah Moses ih daan 10 lungphek cu tuini tiang aum lai an ti. Moses ih daan 10 cu Aksum’s Our Lady Mary of Zion Church hnuai ah an retṭha ih zohman zoh siang loin an kil ringring, an nunnak thapin an kilhim thu pawl BBC thuthang sungah an tarlang.

Be the first to comment

Leave a Reply

Your email address will not be published.


*