“Kum 5 Te Tal Cu Lal Ning La Kan Ram Cu Leitlun Ram Thangso Cazin Lakah A Telve Ding”

Myanmar ramsung thuneihnak latu Min Aung Hlaing khal amah tawk ah tumtahnak arak nei ve, Myanmar khawpi Nay Pyi Taw cu Sui Khawpi ih tuah a tum rero lai.

Ralkap in ramsung thuneihnak an lak ruangah Myanmar ram cu a tlasia vivo, ramsung ih um ramdang mi pawl ih company khalin sumdawngnak an tuah duh nawn lo Myanmar ram cu an suahsan rero zo.

Culai ah Min Aung Hlaing in, “Kum 5 te tal cu lal thei ning la kan ram cu leitlun ram thangso cazin lakah a telve thei ding. Sumpai a tam sinsin dingih sui man khal a kaiso vivo ding, ramsung ihsin thil tampi kan sersuak thei dingih sumdawngnak lamah thinphang aum nawn lo ding” a ti.

Min Aung Hlaing cu September thla zarh hmaisa lam ihsin hmun dangdang ah a tlawngkual vivo ih thusimnak le forhfialnak anei. Tuisun September 18 khalah Kachin khawpi Myitkyina ah ava tlawng tum ih ni 2 sung a cam ding, Kachin ramsung ih um ralkap hotu pawl thawn an tongaw ding. Curuangah Myitkyina khawpi cu ralkap le palik pawlin an kil thepthep.

Be the first to comment

Leave a Reply

Your email address will not be published.


*