Kum 73 Mi CDF-Mindat Paralṭha Ih Fapa In “Ka Pa, Na Hnen Ka Ra Thlengsal Thei Hrih Lo Ruangah In Ngaithiam Aw” A Ti

Chin ram, Matupi le Mindat karlakah ralkap le CDF-Mindat pawl an kapaw cimaco ih ralkap 10 hrawng an thi, hliamtuar khal tam zet an um. An doawknak ah CDF-Mindat paralṭha kum 73 mi ih nunnak a liam, hliamtuar 2 an um nan seherh um dinhmun an si lo.

“Nunnak liamtu kan pu cu kum 73 a kim zo. CDF-Mindat hrangah meithal le zen in tuahsaktu a si. Kan rinsan zetmi a si ih ram le miphun duhdawt zettu kan pu a si” tin an tarlang.

A fapa in, “Na fale pawlin kan lo kham rero nan na nunnak khal ui loin mipi le uico ralkap pawl doawknak ah hmainor ih poksuaktu ka pa, na ṭuanvo na hlensuak. Dothlennak ih nunnak liamtu CDF paralṭha pawl thawn upatnak ka lo hlan. Ka pa, na hnen ka ra thlengsal thei hrih lo ruangah in ngaithiam aw” tin a tarlang.

November 3, 2021 zinglam nazi 10 ihsin 11 tiang an doaw, tank 2 le ralkap motor 75 cu CDF-Mindat in an kap ciamco hnu ah dunglam an kirsal, cutawk ah ralkap pawlin pukpi thawn an kap ih CDF-Mindat paralṭha kum 73 mi ih nunnak a liam.

CDF-Mindat thuphuangtu in “Kan kap ciamco hnuah dung kan sip laitak ah pukpi thawn in kap ih a nunnak a liam. Fimthiamnak zung ihsin cawlh latu kum 73 mi a si. Kan zaten doawknak ih tello dingin kan kham rero nan a thinlung a pacang tuk, meithal picang ih kahnak ruangah hliamhma a tuar ih mual a liam” a ti.

Thaisun lam khalah CDF-Mindat le ralkap pawl hi kapaw thei dinhmun tam sawn ah an um. Boruak umtudan an zoh rero lai. Kalaymyo thlanglam khalah mipi kilhimtu le ralkap pawl an kapaw ciamco. November 2 le 3 sun ah nasa zetin an kapaw ih ralkap lam 50 hrawng an thi. Kalaymyo mipi kilhimtu Ko Lin Naing ih nunnak a liam thu Kalay-PDF in an tarlang.

Be the first to comment

Leave a Reply

Your email address will not be published.


*