Kumhnih Sung Zumtu Fala Le Tlangval An Duh Aw Ih An Hnam Aw Hrih Lo, A San Le Mipi Ih Soiselnak

US, Texas khua ih um fala kum 22 mi Kaytlin le a tlangval Drew cu kumhnih sung an duh aw zo, an umtlang ṭheu. Kumhnih sungah an hnam aw hrih lo ih nupa-sinak khal an hmang lo, an thuhla cu an rualpi pawlin an thei ih online sungah an tarlang sak.

Online mipi pawlin ‘an duh aw ngai lo a si ding. Rualpi sawn nan si ding, a tlangval Drew hi a pa lo a si kha. Tuai a si ding…’ tin a phunphun in an soisel. Duhthu an simawk ni ihsin hnam aw lo ding, taksa puahcok aw lo dingin an sim aw cia.

Kaytlin in, “Nupa-sinak kan hmang lo ruangah duh aw lo kan si lo, kan duhawknak a hngetkho sawn. Mi famkim cu ka si lo, ka tlangval thawn kan hnamawk ruangah Hellram tla ding ka si lo. Asinan, keimah le keimah control awk ka duh.

Bible sungah fala le tlangval duh aw pawl ih umdan ding thuhla hi a cipciar in an ngan lo. Asinan, neihawk hlanah nupa-sinak hmang lo dingin in fial. Nupa-sinak ih a thoknak pawl cu hnamawknak, kutkaih awknak le taksa thamawknak hi a si.

Pathian in mah le mah kilhim aw dingin in fial, ka taksa hi ka pasal hrang lawngah ka ret ṭha. Leitlun ih hmuhdan vekin kop aw kan si lo, kan hnamawk lo ruangah duh aw lo kan si lo, kan thinlung kan theifiang aw tuk” a ti.

A tlangval khalin, “Rualpi ihsin kan duh aw, hmailam caan hrangah kan kilhim aw. Kaytlin hi nupi ah ka nei duh. Tuai ka si lo ih kan taksa kan kilhim aw sawn a si” a ti.

Be the first to comment

Leave a Reply

Your email address will not be published.


*