Kutsihnak Ah Meisa A Thi Ih Monu An Thlengaw Sual

India ramsung ah thilmak le danglam zetzet a thleng ṭheu. Madhya Pradesh ih um nunau unau hnih cu May 8, 2022 zan ah hmunkhat ah pasal an nei, India ram hmun ṭhenkhat ahcun nazi 12:00 ah kutsihnak an nei ṭheu. An pasal Bhola le Ganesh cu innsang dangdang an si.

Kutsihnak an neih laitak ah meisa a thi, serh le sang an tuah lai a si vekin puithiam in kutsihnak a tuah vivo. Meisa a thih ruangah monu cu an theithiam lo ih an thlengaw sual, monu cu an hnipuan hruhmi le an ceiawkdan khal a bangaw ciahciah.

Lungawi zetin kutsihnak an ṭheh hnuah inn lamah an tlung ih monu an thlengaw ti an thei, inn an thlen hnu lawngah monu an thlengaw ti an thei cu mak an ti zet. Khatlam khatlam an bia’aw lohli ih a thaizan ah kutsihnak an nei ṭhasal.

Thudang: Mopuai Ah Mopa A Feh Tlai Ruangah Monu In Midang A Nei: India, Malkapur Pangra khua ah mopuai hlunghlai zet ih nei dingin an tawlrel. April 22, 2022 zanlam nazi 4:00PM ah mopuai nei dingin tim an tuahaw, thil ziangkim an tawlrel thluh zo.

Asinan, mopa le a innsang pawl cu nazi 4:00 ah an thleng lo, monu tei innsang le mipi pawlin an hngak ringring ih an beidong tuk. Zan nazi 8:00 khalah an thleng cuang lo, cumi hnuah an va thleng ih an karlakah buainak a suak, an sualaw.

An tlainak a san cu mopa le a rualpi pawl cu an lungawi tuk ruangah zu an in ciamco ih an lam rero ruangah mopuai ding caan khal an thei nawn lo. Monu ih pa in an makpa dingah a duhsal lo ih an ṭhenaw fel.

Cutin mipi lakah mopa ding an hawl ih an sungkhat mipa pakhat thawn an neikawkter cih. Monu ih pa in, “April 22 zanlam nazi 4:00 ah mopuai nei dingin kan relcia, zan nazi 8 hnu lawngah an ra thleng. Mopa le a rualpi pawl cu zu an in ih an lam ciamco ruangah nazi 8 hnu lawngah an ra thleng ih sualawknak a thleng. Curuangah kan fanu cu kan sungkhat mipa dang thawn kan neihawkter” a ti. (#India Times)

Be the first to comment

Leave a Reply

Your email address will not be published.


*