Lairawn Ah Oxgyen Cetpi Leidan Ding An Relfel Zo

Lairawn OXYGEN PLANT PROJECT hrang Kalay Northwest Area Zulvo Kan Relfel Zo. Central Chin Pawlpi kaihhruainak in Lairawn ah oxygen cetpi bun thei dingin zuam rero a si. Hi oxygen plant project hrang budget estimate kyat ting thawng hnih sungin kannih Kalay Nitlak-saklam (Letpan Sub-center Area) zulvo cu kyat ting zathum (15%) a si.

Caakkhai thil a si ruangah zamrang thei bikin khawtin palai meeting kan ko-aw cih ih, mani 14.7.2021 (Wed) ni, Letpanchaung PCM Vengpi mandat ah lai kan rel. CCP President, Treasurer le Oxygen Plant Project Treasurer-in in ra telpi thei.

Khawpi lam pawl thil ttha tuah lamih vun ngiarnak ah kan zulvo ting 300 hi dungsip loin kan cohlang. CCP pehtlaih hnget mi khua vial kan suakkhawm tikah khua kan mal zet. Zuk sungih ta vek khin zulvo kan zemaw hai. Mah le zulvo cio mai’ thiam dan danih pitlin tum ding a si ta mai.

Tu tiang kan rak talbuainak ah mah le khua cio ih ramsung ramleng kan rinsanmi le kawhhran zate deuhthaw kan rak hnai thluh zo. Vun dil bet ding khal kan hmaisong tiin a daih nawn lo. Innsang tin khalin thei tawk bur khawm kan zuam ding.

Innsang pakhat cio khal hi kum 2 sung harsat tong zo kan si cio ruangah, bomnak pek lam loih sum va khon lam lam ding khal cu khawruahhar za a si. Oxygen Plant Project hrang a rak ttul ah, a cet lei le bun ttheh hlansung rak cangvaihnak fund a ttul fawn si ah, kan phur cu a rit khawm cio a si.

Mah le khaw dinhmun vun relin, rameng ih Letpan tefapawl in “Ambulance lei kan zuam lawlaw pei uh” tiah in thlakam mi hman “Ambulance cu kan duh tuk ko nan, emergency ih kan sualsuah khawm ding mi oxygen cetpi leinak ah kan ttangkhawm hrih pei uh” tiah kan ti.

Siivai le thilri in bawm tumtu rualpi khal “A sumfai in rak ret hrih hram uh. Oxygen cet kan zuam khawm tikah run hlu sawn hram uh” tiah ka rak ti vivo. Lairawn hi kan Laimi mipum tam bik umnak le tui ttumah mina le mithi khal kan tam biknak a si. Oxygen cet pakhat kan sualsuak khawm thei lo a si ahcun a beidongthlak nasa ke. Ningzakza khal a si ding.

Khaw 7 in ting 300 kan hawl hmu thei pei maw? Mai’ sungkua ah oxygen ttul tuk um si bang sehla, ting 300 cu rel lo ting 500 khal neih thing-lung khawng le a bak a thlar khalin cem kan huam ko ding. Oxygen kan rak cah ttheu nak Yangon, Mandalay cu beisei ding a um nawn lo tluk a si.

Beiseinak fem ngiaungi umsun cu Mizoram ihsi lakluh tum a si thlang. Lockdown run pahtlang ding, ramri pahtlang ding hi ni tam zan tam kan ti thei pei maw ti cu khawruahharza a si fawn. Pathian rinsanin kan vun zuam khawm hai pei uh aw. Nunnak hi a va rak sunglawi em! (# Jesse Klirlungz Kipling)

Be the first to comment

Leave a Reply

Your email address will not be published.


*