Leitlun Ralpi 3-Nak: Pu No Than Kap

Pu No Than Kap: “Leitlun Ralpi 1nak (1914-1918); Ralpi 2nak (1939-1945). Ralpi 3nak..?? 1962 ah Soviet Russia in US kiangte Cuba ramah nuclear phur thei rocket a ret ruangah US in a duh lo. Ralpi vei 3 nak a suak zikte. Leitlun mipi thin phu dutdo in kan rak um phah. Russia dung a tawlhsal ih a daisal.

Tu ah, Russia in a ramhnen Ukraine ih ramthen 2 cu Independence a puansak. Ukraine timi hi tuhlan ah Soviet Russia sungih rak um dah ram pakhat, 1991 ih Soviet rampi a phel zawngah Independence ngah a si. Russia thawn cawcang khitaw ding bangih engaw riairiai NATO timi USA le ramdang dang 30 kawm pawlpi ah Ukraine a lut a phangih, khamcianak ah tin Ukraine ram pumpin Russia in lak cih thluh a tum.

US le NATO (North Atlantic Treaty Organisation) in Ukraine an bawm danih zirin Russia thawn an buai vivo thei. Thil umdan theih awl dingah, China hin Myanmar ram sungih WA le MONGLA ramthen 2 khi-kan China ṭong hmang ve ka hnampi an si tin, Independence puan sak sehla, cucu duh tawk loin Myanmar in India le US a kawp taktak ka phang tin ram pumpiin lak cih tum sehla, cuvek a si.

A taktak khalah, WA le MONGLA cu China in a fahniang vekin a ret ruangah Independence tlukin an um zo. Ralpi 1nak le 2nak karlak hi kum 20 fang a si. Cumi sungte ah leitlun ah ralthuam maksak le rapthlak a suak ciamco. Ralpi 2nak a thlen cun, tipi le vantlun tiangin doawk a si. Bomb pakhat in mipum thawngza tam thiter thei neitu Ram 7, 8 laiin an um zo ruangah, kutzung ih hmeh men in Leitlun pumpi kang alh thluh thei a sizo.

Hiruangah, Atomic bomb lalpa ti theih Judah pafim hminthang Albert Einstein cun, thil umdan ding thei cia in:_ “Leitlun ralpi 3nak suak sehla ziangvek ralthuam hmangin an doaw ding ti ka thei lo. Asinan doawk a cem ih Ralpi 4 nak a suaksal tik ahcun, funghreu le lungtum hmangin an doaw ding” a tinak a si.

A sim tummmi cu, Ralpi 3nak a suak pang ahcun, ralthuam ṭihnung tamtuk an hman ding ruangah, santhar ih neih mi vanzam, mawtaw le inn le lo ṭha ṭha khal vutzam an cang thluh ding, doawk a cem cun lungpuk sungih umsan (stone age) kan thlengsal dingih kan doawk tik khalah, thir ih tuah mi meithal hman hmang thei nawn loin funghreu le lungto kan hman a ṭul ding, a tinak a si.

Russia le Ukraine buai cu tanta in, kan piannak ram rethei hnianghni te Myanmar sung hmanah, hmuhdan le duhdan bangawk lo ruangah, huatnak a pung, duhdawtnak le ngaidamnak a hlo vivo ih neihsun hriamhrei hmangin, ramsa sualaw hnakih rapthlak in kan sualaw, kan doaw, kan thataw rero zo cu a si hi.

Zumnak ruangih Sihte thah hman duh lo Bhudists le duhdawt le ngaidam thupitzia aupitu Khristians tiangin, Cutawkah, khatawkah, zopawl in zopawl an kap that, cuzat khazat an thi,_ tivek thuthang theih can hmanah, “.. minung nunnak mankhung laksakawk cu a va pawi ve .. daihnak hawl uhsi .. remnak dap uhsi,” ti lam hnakin “… a lungawium, … an va cim ve, … an va thi mal ve, … thi thluh haiseh,” ti a si men thlang.

Ngaidam thei lo ih Huatawk hnuhnu cun thah tlak setan le ramhuai vekah kan hmuaw thluh men a sibik. Can netnak a thlenzik tikah,_ Daihnak, remnak le duhdawtnak a hlo vivo dingih huatawknak le doawknak in a khat ding, thutak hnakin thulengvak men theih hiar in hna a za nohno ding,_ timi hi tui kan san a si mahna!

Be the first to comment

Leave a Reply

Your email address will not be published.


*