Leitlun Sibawi In “Covid-19 Suahnak Hrampi Kan Theih Lohli Lo Asilen Covid-26 Le Covid-32 An Suak Ding” A Ti

Covid-19 natsia in leitlun ramtinkim a nuai ciamco ih mithi le damlo khal an tam zet zo. Covid-19 suahnak an timi China khawpi Wuhan ahcun Covid-19 natnei an um tuk nawn lo, May 19 ah “China Tourism Day 2021” cu Wuhan khawpi ah hlunghlai zetin an tuah thei.

Cuti laiah leitlun ramdang pawl cu Covid-19 nathrik in an rak buai rero lai. Texas Children’s Hospital Center for Vaccine Development co-director Peter Hotez in “Covid-19 suahnak hrampi le a thuhla kan theih thluh lohli lo asilen Covid-26 le Covid-32 an ra suak ding” a ti.

Covid-19 cu China, Wuhan Institute of Virology ihsin putsuak tin thuthang aum nan nenhngetnak ngaingai cu aum cuang lo, Scientists pawlin palang asilolen ramsa ihsin suak a si thei an ti.

China cozah in zingzoinak neih a siang lo ruangah an buai zet, USA president thar Joe Biden khalin ‘Covid-19 cu China ihsin suak a si a ti zo ih zingzoinak nei dingin a fial lai. China cozah in zingzoinak neih arak siang lo asilen a sumdawngnak phitsak le hringhro a tum.

China Foreign ministry Zhao Lijian in ‘Joe Biden ih kamsuak cu kan cohlang lo, sual puhawknak le ramkhel ngirawknak cikhat a si” a ti. World Health Organization khalin March thla ah Covid-19 cu siivai zingzoinak hmunpi ihsin putsuak a si arak ti zo nan a suahnak hmun cu a rel lang lo.

Be the first to comment

Leave a Reply

Your email address will not be published.


*