Jim In, “Jesuh Zuknung Ka Can Hnu Ihsin Hollywood’n In Hnawng Nan Ka Siraw Lo” A Ti

2004 kum ih an tlangthan mi “The Passion of the Christ” zuknung cu an hlawhtling zet, leitlun huap ah $612 million rori an ngah thei, san thuanthu ih zukung hlawhling bik an timi pakhat a si.

77th Academy Awards ah Oscar laksawng ngah dingin veithum rori an thehlut nan mak zetin laksawng an ngah lo. Jesuh lemcangtu Jim Caviezel (kum 53) cu Hollywood zuknung khawvel ah a hminthang zet, asinan Jesuh lem a can hnu ihsin Hollywood in an hnawng ih hnaṭuan tlang an duh nawn lo.

Jim Caviezel in, “Zuknung ka can dingmi 5 khal ka cang thei nawn lo. Ziang sualnak khal ka tuah lo. Jesuh zuknung ka cang men. Bulpak huatawknak maw si ding hitin in hnawng cu ka theithiam lo. Asinan, leitlun ah ka um ringring lo ding, kan tuahmi vekin thuṭhen kan si leh ding.

Jesuh zuknung ka can ruangah hnawng mi ka si nan ka siraw lo, Jesuh zuknung cang ding hrimhrim ka si in ka theiaw. Jesuh zuknung ka can laiah kum 33 mi ka rak si, Jesuh khal a thih tikah kum 33 mi a si. Kan kum a bangaw ciahciah hi thilcang pang a si lo” a ti.

“The Passion of the Christ” zuknung sersuaktu Mel Gibson khal Hollywood ihsin hnawng a si ih amahten zuknung a sersuak ṭheu ih a hlawhtling zet. Mel Gibson in Jesuh thawhsalnak zuknung ‘The Passion of the Christ: Resurrection’ cu a buaipi rero lai ih June 16, 2023 ah an tlangthan ding, himi zuknung khalah Jim Caviezel cu Jesuh lem ah a cang ding.

Be the first to comment

Leave a Reply

Your email address will not be published.


*