Lungmankhung Lai Pakhat A Tla That

Hpakant, Mana khua ih lungmankhung hawl tlangval kum 22 mi Maung Khin Maung Yin cu a hnaṭuannak ah cansualnak a tong ih a tla that. July 9, 2022 zanlam nazi 4:00 hrawngah hna a ṭuan rero lai cu lungto in a lu ah a tlak ngah ih tlanghnuai lamah ava tla that.

A rualpa in, “Lei laihnak cet in lei a lai rero, tlunlam ihsin lungto a tla ih a lu ah a tlak ngah lai ka hmu. Lungto in a lu a tlak ngah hnuah a tla” a ti. A tlaknak hmun hi tili a si, a ruak cu an hawl rero ih a thaizing July 10 zinglam nazi 11:00 hrawngah a ruak cu an hmu.

Nikum December 25, 2021 khalah himi lungmankhung hawlnak hmun ah lei a min ih hnaṭuantu mi 3 an thi.

Thudang: Lungmankhung Laitu In An Rawlsuangtu Nunau A Pawngsual Ih A That, Buainak Nasa Zet A Suak. Kachin State, Waingmaw khua kiangih lungmankhung laihnak hmun ah buainak nasa zet a thleng. July 4, 2022 sun ah lungmankhung lai mipa pakhat in an rawlsuangtu nunau kum 21 mi Daw Tan Baung Khaung Nang cu a pawngsual ih a that.

Daw Tan Baung Khaung Nang cu hnaṭuantu pawl hrang rawlsuangtu a si ih fate 2 a nei. Tualsung mi pakhat in, “Suncaw ei dingin an va cawl ih thlam sungah an lut, rawlsuangtu an hmu lo ruangah an mangbang tuk. Lungmankhung lai ih thlam kiltu mipa cu thu an sut ih arak ṭih tuk, a ke khalah thisen an hmu ih an vuak ciamco hnuah thu an sut ih a simfiang. A pawngsual ih a that thu a phuang aw, hnaṭuantu pawl cu an thinheng tuk ih mi pawngsualtu cu an vel that hnuah a ruak cu an urkang” a ti.

Daw Tan Baung Khaung Nang ih ruak cu July 6 zanlam nazi 5:00 ah an hawl hmu. Thuhla theitu in, “A hloh zan ihsin an hawl thok, July 6 zanlam ah a ruak cu lilawn hnuai ah an va hmu. Taklawng in arak um” a ti. Himi lungmankhung laihnak leiram cu ralbawi U La San Aung War ih leiram a si. Mi pawngsualtu an vuak that ruangah ralhrang pawlin July 7, 2022 sun ah hnaṭuantu minung 4 cu an kai ih thu an sut rero lai.

Be the first to comment

Leave a Reply

Your email address will not be published.


*