Mak Zetin US Ramlakah Innsang Khat An Thi Thluh, An Uico Khal A Thi

England nupa kum 45 mi Jonathan Gerrish le kum 31 mi Ellen Chung cu an duhdawt aw zet ih fanu kum 1 mi Muji an nei. US, California, Mariposa tlangram khua te ah an vai ih Jonathan cu Google le Snapchat ah hna a ṭuan. Zarhpisun ah Sierra National Forest ramlakah boruak thiang hawp dingin an va feh, an uico khal an hruaitel.

A thaisun monday ah Jonathan cu hnaṭuannak ih a lang lo ruangah an phone rero nan an rak kai thei lo ruangah a hnaṭuanpi pawl cu an ngaih a ṭha lo. An inn ah a pi ava feh ih zohman a hmu lo ruangah a mangbang tuk ih palik pawl hnenah a sim thei.

Cutin palik pawlin an hawl ih Sierra National Forest gate kiangah an motor ret mi an hmu, ramlak ah an va hawl ciamco ih thicia in an hmu. An nupa in an thi ih an fanu kumkhat mi khal a thi, an uico khal a thi. Asinan ziangtin an thi ti cu tutiang an theithei hrih lo, sibawi pawl khalin zohdiknak an nei rero nan an thihnak san hi an hmu thei lo ruangah an mangbang tuk.

An uico ruak an zohdik rero lai ih an uico ihsin an thihnak hi an theithei ding ti beiseinak an nei lai. Mariposa County Sheriff, Kristie Mitchell in “Tuitiang an thihnak hi kan theifiang hrih lo. Meithal kahnak hliamhma aum lo, hliamhma zianghman an tuar lo. Cun, thatawknak cahnah khal kan hmu lo” a ti.

An hmeltheih pawlin ‘nupa duhdawtaw zet an si ih anmah le mah thataw ding cu thilcang thei lo a si’ an ti. 2021 July thla ah US Forest Service pawlin “Merced River tiva le a kiangkap ah tur nei hrampi an rak hmuh ruangah Merced River tiva ah zohman takkolh lo ding. Rannung pawl khal tiva ta tidai inter lo ding” tin thu an rak phuang zo.

Asinan, Jonathan Gerrish tei innsang thihnak hmun le Merced River cu a hlaaw tuk. Ṭhenkhat ih an zumdan ahcun tursia hrampi & buk sungih tuisia thlihrang ruangah an thi si ding ti an zum.

Tualsung ṭuanvo neitu in “Hitawk kiangkap ah kum 20 sung ka rak um zo ih hivek ih thihhlohnak kan tong dah lo. Hitawk kiangkap ih tiva le puk pawl cu an thianghlim, an ruak parah meithal kahnak, hliamhma zianghman an tuar fawn lo.

Mah le mah thatawknak ca an ngan fawn lo, hitawk hmun ah innsang hlim zet an ra ih an naute le an uico thawn an thi thluh ti cu thildik lo a si. A mak tuk aw” a ti. Jonathan Gerrish tei innsang thihnak san hi an nenhnget thei hrih lo ih an zingzoi rero lai. (The Sun)

Be the first to comment

Leave a Reply

Your email address will not be published.


*