Myanmar, Tanintharyi, Nyaungzin khuami Ko Aung Naing (kum 43) cu Malaysia ram ah hnaṭuan dingin ava feh. Tipithuanthum parah ngakai in hna a ṭuan, ni 7-nak ah a hnaṭuannak lawng sungah cansualnak a tong.
Thil an thiarnak hridai a cat thutthi ih thilri in a tlak ngah, a hngawng ruh a siahsuah aw ih a thi. A innsang pawl ih bawm dilnak vekin mibawmtu pawlkom in June 19, 2022 zinglam nazi 11:00 ah Malaysia ram ah an vuiliam.
A rualpa in, “A hlan ahcun Thailand ram ah hna arak ṭuan ṭheu. Malaysia ram a thlennak hi a rei hrih lo, hitin in thihsan mai cu a riahsiat um tuk” a ti. Tanintharyi tivapi kiangkap ih um pawl ngakai ih eihawl ṭheu an si. Thailand le Malaysia ram ah daan loin an lut ih ngakai in hna an ṭuan.
An hnaṭuannak hmun ah cansualnak tong le kaih tong khal an um hnuaihni zo. Kan dung June 9 khalah Malaysia ngakai lawng pakhat cu Indonesia tipithuanthum parih an feh ruangah an rak kai, cumi lawng sungah Kawlram mi (9) hnaṭuan in an um ih an kai thluh.
Leave a Reply