Malaysia Ah Hnaṭuan Ih Um Kawlram Mi Cu Zanriah Khawh Hnuah A It Ih A Thi Lanta

Malaysia, Klang Kapar khua Sofa cetzung ih hnaṭuan Kawlram mi U Shwe Maung cu June 1, 2022 zanlam ah zanriah an ei ih an khawh hnuah a it.

A thaizing June 2 zinglam nazi 7:00 hrawngah hnaṭuan dingin an thangharh ih arak thi zo. Ziang natnak in a thi ti an thei hrih lo ih Tanjung Karang Hospital ah zohdiknak an nei rero lai, a natnak pawl an theihfiang hnuah a vui ding ni le caan cu an thanaw leh ding.

U Shwe Maung hi Chinmi a si ih innsang cawmtu a si. Kawlram ih an umnak cu Rakhine State, Mrauk-U khua ah a si.

Thudang: A Fala Hlun In Tlangval Thar A Nei, An Pahnih In A That
Thailand tlangval kum 24 mi Morakot in a fala hlun le a tlangval thar cu meithal in a kap that. Morakot cu ralkap ṭuan zo a si. A fala kum 24 mi Fah thawn an ṭhenaw, a fala hi a hmuhsuam ṭheu ruangah a fala in a tlansan ih tlangval thar a nei.

A tlangval thar cu kum 25 mi Korakot a si, Fah cu a tlangval hnenah aum. Morakot in a fala hlun ih thuhla a theih veten a thik tuk ih an umdan a hawl, an vengsung ah ava hawl ṭheu. May 24 sun ah an vengsung ih um mino kum 19 mi hnenah an umnak a sut ih arak sim.

Morakot cu an innsung ah ava lut ih a fala hlun cu meithal in vei 2 a kap, a lu ah a kap. A tlangval thar khal vei 6 a kap ih a hmun ah an thi veve. Korakot ih pate in, “Meithal awn ka thei ih an innsung ah ka va lut cu an rak thi zo. An nenaw, ṭongkam el’awknak le sualawknak thawmvang khal ka thei lo. Ziangkim tawlrel cia ih kap that an si ding” a ti.

Palik pawlin kiangkap CCTV fehtlang in an zingzoi ih tualthattu Morakot cu an kai, an umnak address simtu mino kum 19 khal thusut dingin palik pawlin an hruai. Mithi Korakot ih pa in, “Ka fapa in buainak a tuah dah lo, midang thawn khal buainak an nei dah lo. A fala Fah thawn an umtlang ti khal kan rak thei lo, an thih hnu lawngah kan thei. Fala le tlangval duhdawtnak ruangah thihnak a thleng” a ti.

Be the first to comment

Leave a Reply

Your email address will not be published.


*