Malaysia & Delhi UN Thuhla

Malaysia FPM-FRO: “Malaysia ah Chin mi thawng sawmnga kiangkap kan um, cumi lak ah UN Card le UN cahnah kai hi a hrek hnak ih mal kan si, a hrek hnak ih tam hi UN ngah dahlo le reject a tong zo mi pawl an si. Kum reipi UN beisei ih um tlun ding sinpi lole kan ram dinhmun ruangah Malaysia ah beunak hawl ih ra tlantu kan tam vivo. Malaysia ah UN beisei ih a um mi UN fehdan thei hrih lo tete pawl theih dingah a hnuailam ih nganmi pawl thaten siar cio hram uh.

UN Mithar Lak Thawn Pehpar: Tuihlan kum reipi ihsin UNHCR cun kawlram mi pawl hi UN zung ah direct UN dil theinak caantha a rak pe dah lo, nan 2019 ihsin UNHCR cun Website a tuah ih cumi website ah UN a ngah dah lo pawl hmuahhmuah appointment dil theinak lamzin a on sak.

Tu dinhmun ah UN in mithar a lak mi pawl cu damlo besia sizung um, operation tuah ṭul dinhmun ih um (memo-doctor ca ngansak mi) thatei a neitu pawl, nupa buainak ruang or thildang pakhatkhat buainak ruangih emergency ih humhimnak tultu (tetti nei mi) lawng a lak hrih lai.

Hminsin: Tu hrih ah cu abur in mithar lak ding timi thu a umhrih lo. Cun tu dinhmun ah cu Kawlram ah CDM ruangih ra thleng pawl khal Co-U pek in UN in a lak cuanglo, a tlun ih tarlang mi Co-U an pekmi tahfung ih tlinnak an neih lawng ah cohlan an si. Tu dinhmun ah UN mithar lak ding thu thawn pehpar in ruahsannak tumpi a um tuk lo vek a bang nan lamzin pit bembem a si lo ruangah thinsauten kan hngak cio hram ding a thupi.

UN Reject Thawn Pehpar: UN cun reject a tongtu pawl Email kuat in case onsalnak dil theinak caantha cu February 2021 ihsin a pe thok. Email kuattu lak ah interview kawh mi tete an um phahphah zo, nan mi tam an si hrih lo. Damlo besia sizung um, operation tuahtul dinhmun ih um, memo (doctor ca ngansak mi) thatei a neitu pawl, nupa buainak ruang or thildang pakhatkhat buainak ruangih emergency ih humhimnak tultu thenkhat card ngahsal an um phah rero zo.

UN Status/Sinak Thawn Pehpar: UN Status hi phun 2 in a um. (1). Refugee: Raltlan rori a si ih UN ih pom mi, card pek mi. Raltlan sinak thawn pehpar thusutnak / interview (tu ih RSD interview timi hi a si) ong mi pawl lawng Refugee ih pom an si. UN lamzin in cu Refugee ih pom mi lawng ramthumnak feh theinak lamzin a um.

(2). Asylum Seeker: Humhimnak hawl a si ti ih UN ih pommi
Damlonak ruang, thlawngtlaknak ruang le 2013 mithar lak tum ih UN Card / cahnah ngah zo nan Raltlan sinak thawn pehpar thusutnak / interview tuah hrih lotu pawl le, interview tuah zo nan result hngak rero lai mi pawl an si. Himi interview tuah dah lo nan UN card pekmi pawl cu Asylum seeker dinhmun ih um an si ih, UN lamzin in cu ramthumnak feh theinak lamzin a um lo.

THUBET: 2020 tiang ih UN cahnah ngahtu Case buaibainak um lo mi hmuahhmuah UN cahnah ihsin Card ah an thleng theh. Refugee ih pomfel ruangih Card ngah / pek theh mi a si lo timi kan theih cio a tha. RSD interview theh zo nan tutiang ziangmi Status / Dinhmun ka si ti a theilo mi pawl cu RSD department – mlslursd@unhcr.org ah email kuat in Status sut a theih ringring.

Resettlement Thawn Pehpar Step: (1). DSU (tuihlan ih RST ti ih kawhmi) – Ramthumnak fehnak dingih interview a si, Interview theh hnuah na file khuitawk Ram ah an kuat ding ti thuthennak an tuah ding (mithen cu Interview lai le interview hlan ih fehnak ding Ram sim cia mi an um), UN ih na file an lo kuatsaknak Ram na duhlo asile el a ngah, nan na el a si le ziangtik ah caantha na ngahsal ding ti sim theih a si lo.

DSU interview theh ah na file an kuatnak Ambassy or Lahwahkah in interview an lo tuahsal ding (ram thenkhat cu interview tuahnak hmuh ah UN zung an hmang, ram thenkhat cu an mah Ambassy zung an hmang). Case feh rang le rang lo caan bikhiah cekci a um lo, a laktu Ram le case thawn pehpar a si.
Resettlement dil duh lole interview theh zo nan file tangmi pawl email thawn sungsannak ca kuat a ngah mlsludsu@unhcr.org.

(2). RSC (tuihlan ih OPE ti ih kawh mi) – RSC cu USA ih file kuat mi pawl hrang lawng a si, Himi interview theh ah MY number timi na ngah ding. RSC interview theh hnu zingzoi na duh le RSC Department Phone 03 2141 5846 or email KLInquiries@rescue.org ah zarhhnih voikhat zingzoi a theih ringring.

(3). DHS /lahwahkah – USA cozah ih thlah mi officer in UN zungah interview an lo tuah ding. DHS interview theh hnu zingzoi na duh le RSC Department Phone 03 2141 5846 or email KLInquiries@rescue.org ah zingzoi a theih ringring.

(4). IOM / thisitnak – Ramthumnak a fehtu ding zaten IOM in thisit / checkup tuah tul mi pawl le Vazam pawl tuanvo a lak theh. A tul mi pawl theh thluh hnu ah sungsan na duh le Phone 03 923 5540 or email iomkluing@iom.int pawl ah sungsan a theih.

HMINSIN: A tlun ih kan tarlang mi pa (4) pawl hi a tlangpi thu in Resettlement thawn pehpar ih theihtul mi pawl an si. Ram pakhat le khat ih process / fehdan or case pakhat le khat a bang awk theh lo timi kan cing cio ding.

Theih Tengteng Tul: Malaysia ah UN beisei in kan um ceng a si le, UN Card / Cahnah neitu zate in mai UN number le Card / cahnah copy ret tengteng ding, cun mah UN case khal thaten simthei dingin timtuahnak neih tengteng ding. UN nei hrih lo pawl khal UN beisei ih kan um ceng a si le case timtuahnak thaten neih cia tengteng ding.

Vansiat tong ih thawngtlak le damlo besia tongtu kan um phah rinrging ih hivek can ah timtuahnak zianghman a neilo mi pawl buaipi a har zet. Kan hmailam thu theicia kan si lo ruangah kan tuah theimi pawl timtuahnak le ralrinnak kan neih cia ringring ding a thupi.

HMINSIN: Daithlang le duhdahtuk ih um mi tampi ruangah UN lam ih duhsak kan co lo can tampi a um, mi thenkhat hrangah UN hi a thupi tuk lo men ding nan thenkhat hrangah thupi ngaingai mi a si, zozo khal mai hmakhua lawng ruat lo in midang zawnruatnak kan neih cio ding a thupi tuk. UN interview kawh mi pawl khal timtuahnak thaten neih a tha. A tlun ih ngan mi pawl hi tu dinhmun ih UN pehpar ih kan theih mi a tlangpi thu kan hlawmawk mi a si ih kan ngan vek cekci silo in danglam deuh ih thil a fehmi a um tla a si thei”.

Delhi UN Thuhla: “Tulai India cozah (Delhi) in Kawlram mi hnenah India ram suahsan theinak Police Clearance Certificate (PCC) le Exit permit a pe lo. Delhi ih caan reipi um zo pawl, ramdang Visa ngah zo pawl khalin Exit permit an ngah thei lo ruangah an tang lai. CDM tuah palik le ralkap khalin Exit permit an ngah thei lo. Delhi raltlan pawl hrangah ramthumnak hi beisei aum maw? ti thusutnak cu zonhman in fiangten an rel thei hrih lo nan pit bembem cu a si lo.

UNHCR in raltlan thar pawl cu Register a tuahsak ih UCC Card (Under Consideration Certificate) timi a pe, himi a pekmi cu UN Card ngaingai a si lo. Ziangtik ah Refugee Status ngaingai a pe ding ti cu theih a si lo. A pe maw, pe lo ding khal rel theih a si lo. Australia sungkhat koawknak khalah India cozah kut, FRRO ah buainak aum lai ruangah zohman an fehsuak thei hrih lo”.

Be the first to comment

Leave a Reply

Your email address will not be published.


*