Malaysia Fala Hlo An Hawl Rero Mi Cu Kawlram Ah An Rak Kaihrem

Malaysia fala kum 22 mi Chia Min Yong cu a hlo ih an hawl rero hnuah Myanmar, Shan State, Tachileik ramsung ah misual pawlkom in an kaihrem thu theih a si. Malaysia palik pawl khalin an buaipi rero lai.

Thailand ram ah hnaṭuan ding ṭha aum tin cawngianak a hmu ih Thailand ram ah hnaṭuan dingin a poksuak. Cawngianak ahcun thlakhat ah $2000 le $3000 a ngah thei thu an tarlang, cumi cawngianak tuahtu cu misual pawlkom an rak si. Thailand ram ihsin Tachileik ah an hruai ih misual kut sungah a thleng.

Misual pawlin tlensuahnak dingah Singapore $47,685 zat an ngen hnuah Singapore $127,161 zatin an ngen sal. Patrick Ooi Khar Giap thuthang sungah an kaihhremnak hmun ah Malaysia nunau 100 lenglo an um ih a tlangpi thu in tlensuahnak dingah mi pakhat ah Singapore $2000 le 4700 an ngen ṭheu tin an tarlang,

Sumpai thawn an tlensuahmi hi mi 10 an um zo. Chia Min Yong tlensuahnak dingah sumpai an dil tamtuk ruangah a innsang pawlin harsatnak an tong, curuangah Singapore hlasakthiam le lemcan thiam hminthang Wang Lei in sumpai cu a ṭumsak ding thu a tarlang,

Wang Lei in sumpai a ṭumsak ding thu cu online parah a lar ciamco ruangah misual pawlkom in tlensuahnak ding sumpai cu an thansal ih tutiang an tlensuak thei hrih lo. Misual pawlkom in Chia Min Yong cu innkhan pakhat sungah an khum lai ih ziangtin hman an tuah, an sualpi lo ih hna khal an ṭuanter hrih lo thu an sim thei. Asinan, an tlensuak lohli lo asilen a parah thil poi a thleng ding tin an hringhro.

Thudang: Myanmar Ram Ih An Kaihhrem Mi Thailand Fala (2) An Tlansuak; Myanmar-Thailand ramri ih um Myawaddy ah Thailand fala pawl an kaihrem ih hlawhhlang an ṭuanter ṭheu. Thailand fala kum 25 mi pahnih cu Myanmar ramri ah hnaṭuan ding ṭha zet aum tin an bum, Myawaddy ah hnaṭuan dingin an va feh ih misual pawlin an kaihrem hnuah an taksa an zuarawkter. Myanmar ram an thlennak cu a rei zo.

Mikhual pawlin nuamcennak ah an hmang, hna an ṭuan duh lo asilen 25,000 baht an kuanter. Ramri cu Myanmar ralkap pawlin an kil thepthep ruangah an tlansuak ngam lo. Cumi hnuah Thailand ramri kiltu ralkap pawl thawn a thupten an pehtlaihaw thei.

April 27 zan ah an tlansuak ding thuhla cu Thailand ramri kiltu hnenah an sim thei hmaisa ih Myanmar ralkap pawlin in kap that asilen kan ruak hi rak la uhla, kan taksa cu midang hrangah hlu uh’ tin an cah ta. April 27 zanṭim laiah an tlansuak ih Myanmar ralkap pawlin datmei thawn an dum ciamco.

Thailand ramri kiltu pawlin an rak auh ih tiva ah dawp uh’ an ti. An vanṭhanak ah ramri tivapi cu an leuhsuak thei ih Thailand ramri kiltu pawlin an dirsuak. Thailand fala kum 25 mi Ekapop Lueangprasert in, “Kan umnak hmun ah Thailand nunau 300 hrawng cu kaihhrem an si lai, hlawhhlang an ṭuanter” tin Thailand palik hnenah a sim thei.

Be the first to comment

Leave a Reply

Your email address will not be published.


*