Malaysia Pacang In Rukru A Kai Nan A Thlahsal

Tulai hi Malaysia ram khal an buai zet, Covid-19 thlisia in a nuai ciamco ruangah harsatnak phunkim an tong. Ernest Ong timi restaurant neitu in rukru a kai ngah nan palik hnenah report loin a thlahsal thu a facebook cahmai ah a tarlang.

July 8 sun nazi 2:00 hrawng ah rukru cu bike thawn an dawr hmaiah a ding, a thupten an dawr dunglam ihsin a lut ih thilruk ding a hawl. Coka ih an ret mi bag pakhat a la, bag sungah thilṭha tampi aum ih a la.

Cutin, coka ih aum lai cu an driver in a hmu ih a dum, rukru cu a bike khal la man loin a tlan ciamco ih bag le a bike tawh cu a thlau. Motor diver in bag le a bike tawh cu a la ih dawr ah a kirsal, cumi hnu nazi 1 hrawngah rukru le a upa cu an va fehsal ih a bike tawh lakdan ding an tawlrel.

Cutin an um laiah hnaṭuantu pawlin an kai ih palik sakhan ah an hruai tum. Asinan, restaurant neitu Ernest Ong in thilumdan a sutfiah lawk, rukru ih upa in ngaithiam a dil rero ih.

Rukru khalin a thil ruknak san a phuangaw, thla 6 sung hnaṭuan ding nei loin aum zo. Cun, naute an nei pekte ih an naute ih in ding cawhnawi leinak ding sumpai an neih lo ruangah thilruk ding a hawl thu a sim. Ernest Ong in a zangfah ruangah palik sakhan ah a report lo ih a tlungter sal, asinan hmailam caan ah thilru nawn loin hnaṭuannak hawl sawn dingin forhfialnak anei.

Be the first to comment

Leave a Reply

Your email address will not be published.


*