Thailand Motor Cansualnak Ah ‘Pa Hu Lian’ Telin Mi 3 An Thi

August 17, 2022 zinglam nazi 11:00 hrawngah Kawlram mi pawl to mi motor cu Thailand lamzin kap ah cansualnak an tong. Daan lo ih Thailand ramsung lut an si, motor sungah Kawlram mi 33 an to.

Kiangkap ih um pawlin, “Motor ihsin puak awn kan thei ih motor cu an control thei nawn lo ruangah lamzin kap ih um thingkung cu napin an pah. Motor cu a let sia thluh” an ti. Cansualnak tong Kawlram mi pawl cu Malaysia ram ah hnaṭuan dingih feh an si tin Thailand thuthang sungah an tarlang.

Motor cansualnak ah minung 3 an thi ih 4 in hliamhma nasa zet an tuar. Minung 20 lenglo le motor mawngtu cu thinphang zetin an tlansuak, Thailand palik pawlin mi ṭhenkhat cu an kai ngah sal ih ṭhenkhat cu kai dingin an hawl rero lai.

Motor cansualnak ah Kalaymyo, Indaingkone veng ih um Pa Hu Lian (kum 20) telin mi 3 an thi. Mithi pakhat khal Kalaymyo ih um ti a si nan a thuhla hi zingzoi rero lai a si.

Pa Hu Lian in a nupi le fanu kumkhat mi a thihsan, a ruak cu tlunpi dingin a innsang pawlin an tawlrel rero lai. Mithi le hliamtuar pawl cu a naibik siizung ah an phurlut ih zokdiknak an nei rero lai.

Be the first to comment

Leave a Reply

Your email address will not be published.


*