Malaysia Ram Ah Hnaṭuan Dingin A Feh Ih Lamzin Ah A Thi, Lamzin Ah An Phum

Rakhine State, Buthidaung peng, Kyeng Kyung khua ih um kum 29 mi Ko Ko Naing cu innsang harsatnak ruangah Malaysia ram ah hnaṭuan dingin a feh ih lamzin ah a thi. Ko Ko Naing hi U Thein Soe Aye le Daw Ma Hla Yin tei fapa nautabik a si, university tlawngta a si.

Motor sungah minung 34 an relh ih July 30, 2022 zan nazi 2:00 hrawngah thawsam in a thi, ramlak lamzin ah a nunnak a cem ih an phum.

A upa in, “Kan sungkhat pahnih thawn an fehsuak, motor sungah minung an tamtuk ruangah a thawsam ih a buai. Thlithiang lut theinak hmun ah an toter ih a ziaum, Malaysia ramri an thleng ih motor an thleng. Motor dangah an va to ih anih cu a feh ve lo, motor sungah an va zoh ih arak thi zo.

A ruak cu a thihnak hmun ah an tanta, kan sungkhat pahnih in an kil ding asilen kaih an tong ding ruangah an fehsan. Motor mawng pawlin an phum thu in sim thei, kan unau 4 lakih nautabik a si ih kan duat zet mi a si, hitin in thihsan cu kan tuarthiam lo, kan riahsia tuk” a ti.

Ko Ko Naing ih ruak cu motor mawng pawlin lamzin kap hmun pakhat khat ah an phum. Ko Ko Naing hi university tlawngkai phah in lo hna arak ṭuan ṭheu, nupi a neihnak hi kumkhat lawng a si lai. A nulepa hnenah Malaysia ram feh dingin a dil rero ruangah an fehter mi a si.

Myanmar ramsung a buai hnuah ramsung ah hnaṭuan ding aum nawn lo ih tualsung mipi pawl cu Malaysia le Thailand lamah hnaṭuan dingin an fehsuak ciamco. Lamzin ah thawsam ih thi le damlonak ruangih thi khal an um. Thailand palik pawl ih kaih tong khal an um hnuaihni zo, ṭhenkhat cu an puaisa ih bum an tong ih harsatnak phunphun in a tlak.

Be the first to comment

Leave a Reply

Your email address will not be published.


*