Malaysia Ramlak Ah Kawlram Mi 2 Cu Hridai In An Tawnbet

Malaysia, Kampung Rahmat khua kiangih ramlak ah Kawlram mi 2 cu hridai in an tawnbet ih an tlansan. PGA7 police pawlin ram an hal ih an va hmu hnuah hridai cu an phelhsak ih thu an sut.

PGA7 Commanding Officer, Superintendent Azhari Nusi in, “September 27 zan nazi 10:30 hrawngah kan naule pawlin ram an va hal ih thingkung ah Myanmar mi 2 an tawnbet mi an hmu. Khuathim zet lakah an hmu, kum 32 mi le kum 33 mi an si. An phelhsak hnuah Identity Documents le khualtlawng theinak cahnah pawl an sut nan an nei lo” a ti.

Lubok Stol Police Station ah an fehpi ih an zingzoi hnuah Kelantan State Immigration Department ah an fehpi leh ding. Malay ṭong an thiam lo ruangah duh vekin thu an sutaw thei lo, Kelantan khua ah kum mallai hnaṭuan in an rak um zo.

An hmin cu Ko Win Naung le Ko Thein Maung Maung ti a si, Kawlram tlunsal an tum ih an puaisa in a bum. An puaisa in thingkung ah a tawnbet ih a tlansan thu theih a si, asinan Malay ṭong an thiam lo ruangah an puaisa ih hmin, thuhla cu an simfiang thei lo.

Kiangkap khuami pawlin PGA7 hnenah “Hitawk ramsung ah ramdang mi pawl an ra ṭheu” tin an sim. Tuiṭum ih an hmuhmi Kawlram mi 2 cu Section 6 (3) of the Immigration Act 1959/63 vekin an thuhla cu an zingzoi vivo ding.

Be the first to comment

Leave a Reply

Your email address will not be published.


*