Malaysia Ramsung Ah Ralhrang Duhlonak Duhphorhnak An Tuah Ih Palik In An Kai

Ralhrang in Myanmar ramsung thuneihnak an lak kumkhat kimnak ah hmun dangdang ih um pawlin duhphorhnak an nei. February 3, 2022 ah Malaysia, Myanmar Embassy hmaiah duhphorhnak an tuah rero laiah tualsung palik pawlin duhphorhnak tuahtu mi 31 cu an va kai ih February 15 ah mi 26 cu an suah zalen sal, mi 5 cu thawnginn sungah an um lai.

Malaysia ramsung ih um NLD upa Ko Soe Htet Thein in, “Duhphorhnak an tuah hlanah Malaysia palik hnenah duhphorhnak an tuah ding thu an va dil ih an rak cohlang. Malaysia palik pawl khalin poi an ti lo, duhphorhnak hi tuah leuhleuh hlah uh tin an lungkim.

Asinan duhphorhnak an va tuah tikah cun tualsung palik pawlin an kai ih palik sakhan ah an hruai, palik pawl thawn an beaw thei nan palik pawlin ‘Myanmar Embassy in thubuai a thehlut, in fial ruangah a si’ tin an simfiang” a ti.

Malaysia palik pawlin veikhat veihnih duhphorhnak tuah cu an siang nan Myanmar Embassy in an rak duh lo ruangah an kai. An kaihmi 25 cu mipa an si ih mi 6 cu nunau an si, Covid-19 daan le dun pahbal thubuai, daan loin ramsung um thubuai le siannak tello in duhphorhnak tuah thubuai pawl an orhter.

February 15 sun ah mi 26 cu an suah zalen sal, an suah zalen mi 26 pawlin ramsung um theinak passport an nei, midang an kaih laimi 5 pawlin passport an neih lo ruangah thawnginn sungah an um lai ih an thuhla hi buaipi rero lai a si.

Be the first to comment

Leave a Reply

Your email address will not be published.


*